Cagirê Hemserekê Pêroyî yê Partîya DEMî Mehmet Ruştu Tîryakî derheqê cezakerdişê Hemşaredarê Colemêrgî Mehmet Siddik Akişî dîyar kerd ke seba meseleya kurdan bêro çareserkerdene û sîstemê qayûmî biqedîyo, ganî na ceza bêro betalkerdene û vat: “Ganî Hemşaredarê ma yê Colêmergî bêro veradayîş û peynîya qeyûman bêro.”
Qerarê roniştişê dewaya Hemşaredarê Colemêrgî Mehmet Siddik Akiş o ke 3 hezîrana 2024î de hetê Wezaretê Karanê Zereyî ra, wezîfeyî ra amebi girewtene û cayê ey de qayûm ameybi tayînkerdene, 29ê nîsane de ame viraştene. Mehmet Siddik Akiş ke bi îdiaya “Rayberê Rixistinî yo” yeno mehkemakerdene, Hepîsxaneyê Ewleyîya Berz ê Wanî ra bi sîstemê Veng û Dimen (SEGBÎS) beşdarê roniştişo 1. o ke hetê Mehkemaya Cezayanê Giranan ê Colemêrgî ra yena viraştene, bi. Heyetê mehkema 19 serre û 6 aşmî cezaya hepsî Akişî rê birna. Sewbîna na serrêke ra zêdeyî porsesêk dest pêkerdo, her çiqas prosesêk est bo zî şar û sîyasetê Kurdî û Tirkîya vera game nêeştişê dewlete û îktîdarî ra gazin kenê. No beno sebebê nêaverşîyayîşê prosesî.
Cagirê Hemserekê Pêroyî yê Partîya DEMî Mehmet Ruştu Tîryakî qerarê mehkema ser o seba Mehmet Siddik Akişî û derheqê prosesî de Ajansê Welat (AW) rê qal kerd.
‘Amanc no bi ke Colemêrgî destê şarî ra bigêrê’
Mehmet Ruştu Tîryakî derheqê dewaya Mehmet Siddik Akişî de wina vat: “Ma baş zanê ke na ceza seba çi ameya dayîş. Wexta ke ma nê weçînayîşî de Colemêrg de serkewtê, na dewa reyna meya rojeve û cezayêka girane hemşaredarê ma rê ameya birnayene û dima ra hemşaredarê ma ame girewtene. Na dewa bi xo, bi hawayêko neheq ameya akerdene. Mehmet Siddik Akiş tena xebatanê partiye û karanê sîyasetê demokratîk kerdêni. Nê sebebi ra dayîşê cezayêka hende giran neheqîyêka gird a. Amanc no bi ke Colemêrgî deste şarî ra bigêrê û şaredarîye ser o qayûmî tayîn bikerê.”
‘Na ceza rayîrê çareserkerdişê meseleya Kurdan xetimnena’
Mehmet Ruştu Tîryakî qiseykerdişê xo de dîyar kerd ke serra 2024î heta nika Kurdîstan, Tirkîya û herême de xeylî çî qewimîyayî û wina dewam kerd: “Prosesêko newe û çareserkerdişê demokratîk seba meseleya Kurdan dest pêkerd. Serrêk û nîm zêdeyî ye ke heme kes qalê nê prosesê neweyî û dewamkerdişê sîstemê qayûman kenê. Rixmê prosesê winasî de, sîstemê qayûmî dewam keno, hemşaredarê ma cezayanê giranan gênê. Ma xo vîr ra nêkerê ke na dewa serra 2024î de, wexta 19 serrî ceza ameybî dayîş, hetê Mehkema Berz ra ameybî xerepnayene û nêameybî tesdîqkerdene, seba ke her hawayî neheqî na dosyaye de estbî. La mehkema, Colemêrgî de vizêrî reyna qerarê xo newe kerd û 19 serrî ceza da. Na ceza seba çareserkerdişê meseleya Kurdan de tena rayîrî xetimnena û rayîrî anêkena. Bi no hawa eşkera beno ke mîyanê sîstemî de yewîye çin a û tayî mehkemê wazenê prosesî bixerepnê.”
‘Ganî gamê qanûnî bêrê eştiş û înan ra yewe zî peynîardena sîstemê qayûman o’
Mehmet Ruştu Tîryakî îfade kerd hetê ke ra dewlete û îqtîdar qalê sîyasetê demokratîk û çareserkerdişî keno, la hetê ke ra mahkeme cezayanê giranan danê û tu gamî nênê eştiş û vat: “Ma eşkenê vajê ke prosesi de xetimîyayîşêk est o. Sebebê nê xetimîyayîşî çi yo? Di hetî est ê, hetêk PKK xo fesîh kerd o, peynîyê şerê çekdarî yê 42î û çalakîyanê xo ardo. Seba ke provokasyonî nêbê, şervananê PKKê xo mîyanê sînoranê Tirkîye ra ant, nê gamê xeylî gird ê. Şarê Kurdî û şarê Tirkîye pêro paşt danê nê prosesî û no firsendêko gird o. La lazim o ke ganî dewlete zî tayî gaman bierzo. Seba ke na mesela bêro çareserkerdene û şerê çekdarî reyna dest pênêkero, gamê lazimî bêrê eştene. Seba zêdekerdişê hêvî û bawerîya şarî, ganî gamê qaûnî bêrê eştene û înan ra yewe zî peynîardişê sîstemê qayûmî yo.”
‘Seba çareserîye ganî gamê şênberî bêrê eştene’
Peynîya qalanê xo de Mehmet Ruştu Tîryakî wina vat: “Heme kes, AKP û MHP zî qebul kenê ke ganî sîstemê qayûmî biqedîyo û lazimî gamanê şênberan esta. Hezaran girewteyê sîyasî estê ke ma înan sey qurbanîyanê komloyan vînenê, dewaya Kobanî de Hemserekê HDPî birêz Selahattîn Demîrtaş û Fîgen Yuksekdag û bi desan kesê bînî, sewbîna Hemşaredarê Amed û Wanî Selçuk Mizraklî û Bekîr Kaya hema zî hepîsxane de yê. Lazim o ke na mesela de gamî bêrê eştene.”
