Rojnameger Cîhan Bilgîn û Nazim Daştan, bi merasimêk ameyê yadkerdiş û sozê taqîbkerdişê rayîrê heqîqetî cangorîyan rê reyna ame dayîş
Rojnameger Cîhan Bîlgîn û rojnameger Nazim Daştan ke 19ê kanûna 2024î de rayîrê Awbendê Tişrînî şaristanê Sirînî de hêrişê hewayê dewleta tirkan yê hemverê wesayîtê înan de dinyaya xo bedelnaye, ewro zî 40 rojîya xo de ameyê yadkerdiş.
Merasîmê yadkerdişî de Meclîsê Keyeyê Şehîdan û Endamê Yewîya Çapemenîya Azade amade bîyî.
Deqeyêk rêzgirewtişî ra dima serê nameyê Endamê Yewîya Çapemenîya Azade rojnameger Ehmed Hîmo vat ke hemrayê ma Şehîd Cîhan Bîlgîn û Nazim Daştan semedê kerdişanê dewleta tirkan eşkera bikerê, înan Vakurê Kurdistanî ra vera xo daye Rojawanî û wina vatî: “Destpêkê Şorişê Rojawanî de xeylêk şehîd û têkoşeran semedê mîrasê nê şorişî canê xo feda kerd. Seba şoriş hîna hîra bibo, dezgeyî ameyî akerdiş û nê dezgeyan ra yew zî çapemenîya azad bîye. Dewleta tirke zî sebea ke vengê rastîye bibirna, her dem rojnemegeran kena hedef. La her çend nê çî bikero zî wa baş bizano ke bi hezaran rojnamegerî est ê ke na raştî nîşanê raya pêroyî bidê. Ma soz danê ke ma do kamera û qelema rojnemegeranê xo erdî de nêverdê û rastî do her dem bêro mojnayene.”
Badê eşkerayîye serê nameyê Meclîsê Keyeyê Şehîdan Hêvî Seyid qisey kerd û vat: “Mîyanê temamê qanûnanê heqanê merdiman de qetilkerdişê rojnamegeran hemverê merdimîye sûcêk o. Seba ke rojnamegerî cayê tewr berz yê komelî de ca gênê. La dewleta tirke her çî semedê xo meşrû vînena û rojane sivîl û rojnemageran hedef gêna. Labelê do embaz û hemrayê şehîdê çapemenîye raştîya ke şehîdê ma waştî eşkera bikerê nîşan bidê û ê do bibê taqîbkerdoxê nê rayîrî.”
Merasîmê yadkerdişî bi sloganê, “Şehîd Namirin / Şehîdî Nêmirenê” qedîya.
