Aydin de Sazgehê Kultur û Hunerî yê Azad bi tewrbîyena xeylê kesan ame akerdene. Qiseykerdişan de wina ame vatene: “Berê sazgehî her kesê ke wazenê nê warî de vatene vajê, bixebitê û berardişî rê akerde yo.”
Sazgehê Kultur û Hunerî yê Azad ê Temsîlîyetê Koşk a Aydinî ame akerdene. Partîya Têduştî û Demokrasî ya Şaran (DEM Partî) ê Aydinî, xeylê rêxistinê komelî yê demokratîk û welatijî tewrê akerdişî bîyê. Dayîka Aştî Behîye Yalçin a ke kurdele birna, waşt ke no akerdiş bibo wesîleyê aştî û azadîya fizîkî ya Rayberê Şarê Kurdî Abdullah Ocalan û vat: “Sazgeh wa heme şarê ma rê bi xeyr bo.”
Badê akerdişî sazgeh de deyîrî ameyê vatene û govende ame girewtene. Badê pîrozkerdişê sazgehî salona dawete yê Sohbetî de şayî ameye viraştene.
Şayî de Hemsereka Komeleya Kultur û Hunerî ya Azad a Îzmîrî Belkisa Suleymanoglu qisey kerd û vat ke aye do sey komele xebatanê xo bi hêzêke gird bidomnê û wina vat: “Berê Sazgehê Kultur û Hunerî yê Azad her kesê ke wazenê nê warî de vatene vajê, bixebitî û berardişî rê akerde ya. Ma wazenê cewab bidê waştişanê şarî. Xebata ma goreyê waştişanê şarê ma dest pêkenê la dima ra ma do her warê hunerî de cewab bidê waştişê şarê xo. Sazgehê ma seba şarêAydinî bi xeyr bo.”
Badê ra xebatkarê Sazgehê Kultur û Hunerî yê Azad ê temsîlkarîya Koşk a Aydinî Rojî Tanhan vat ke aye berê pîya berardişî, pîya îfadekerdişî û pêro pîya berê estbîyayîşî akenê û wina dewam kerd: “Sazgehê Kultur û Hunerî yê Azad, nê erdî de gireyêko newe yê têkoşînê kulturî yê ke bi serran dewam keno. Ma hafizayêke tradîsyanê Merkezê Kulturê Mezopotamya ra (MKM) anê. MKM tena merkezêk kulturî bî. Eynî wextî de vera qedexeyanê ziwanê xo, muzîkê xo, tîyatroyê xo pawitêne.”
Tewr peynî de Sirri Sureyya Onder ê ke seba aştî kedêka girde dabî ame vîrardene. Dima ra pîrozkerdiş bi deyîranê Koma Vejîn û hunermend Mîran Hogir qedîya.
