Vizêrî bi şewe grûbêke nîjadperest hêrişê pîrozkerdişê şampîyonîya Amedsporî kerd. Vera hêrişkaran hetgiranê Amedsporî zî cewab da. La ewro polîsan eşt serê xeylê keyeyan û hetgirê Amedsporî destbendkerdî.
Bi vejîyayîşê Super Lîgî yê Amedsporî pêroyê Kurdîstan, Tirkîya û xeylê merkezanê dinya de pîrozkerdişî ameyê viraştene. Vizêrî bi şewe Stenbol Avcilar de zî hetgirê Amedsporî ameyê pêser û serkewtişê Amedsporî pîroz kerd. Grûbêke nîjadperest vizêrî bi şewe hêrişê pîrozkerdişî kerd û naye ser hetgiranê Amedsporî zî cewap da nê hêrişan.
Polîsan ewro serê sibayî eşt serê xeylê keyeyan û hetgirê Amedsporî destbendkerdî. Derheqê hûmar û nameyê destbendkerdeyan de tu agahî nêameya destkewtene.
