Serekê Pêroyî yê MHP’yî Devlet Bahçelîyî dîyar kerd ke “Prosesê Aştî û Komelê Demokratîkî” de nika wextê viyarştişê qanûnan o û vat: “Ganî statuyê Abdullah Ocalanî bêro dîyarkerdene. Na babete seba ma muhîm a. Ganî meseleya statuyê Abdullah Ocalanî bêra çareserkerdene.”
Serekê Pêroyî yê MHP’î Devlet Bahçelî Meclîs de kombîyayîşê grûbe yê partîya xo de qisey kerd. Bahçelîyî va ke pawitişê aştî nêyeno manaya qelsbîyayîşî û seba averşîyayîşê Tirkîya zî ganî her warî de seferberî bêro destpêkerdene.
Prosesê vîraştişê qanûnan
Devlet Bahçelîyî da zanayene ke babeta tewr muhîm a ya ke meseleya çareserîye binê banê Meclîsî de bêra rayraberdene û wina vat: “Komîsyonê Meclîsî raporê xo yê hemparî amade kerd û xebatê xo qedînayî. Nika dore de prosesê viyartişê qanûnan est o. Meclîsê ma do dest bi viyartişê qanûnan bikero. Çarçewayê qanûnan do goreyê îradeyê şarî bêro dîyarkerdene. Nê prosesî de ganî kes miletanê ma cîya nêkero û wayûbiratîya ma nherimno.”
‘Ganî meseleya statuyê Abdullah Ocalanî bêra çareserkerdene’
Bahçelîyî dîyar kerd ke statuyê Rayberê Şarê Kurdî Abdullah Ocalanî seba prosesî zaf muhîm o û nê nuqtayan ser o vindert: “Ganî statuyê Abdullah Ocalanî bêro dîyarkerdene. Na babete ganî nêra peygoşkerdene. PKKyî bi merasîmêk çekê xo veşnabî û paştî dabi prosesî. Eke ma wazenî heme endamê rêxistine çekanê xo ronê, ganî ma refleksanê lezan bimojnê. Eke seba Abdullah Ocalanî meseleya statuyêkî est ba, ganî na mesele seba xeyrê Tirkîya bêra çareserkerdene. Ganî nameyê mekanîzmaya ke seba naye yena awankerdene zî ‘Prosesê Aştî û Koordînatorîya Sîyasî’ bo. Hêvîya ma aa ya ke Raybero Awanker ê PKK’î binê statuyêk de wezîfeyê xo bîyaro ca.”
Bahçelîyî mesaj da îqtîdarî
Bahçelîyî polîtîkayê îktîdarî zî rexne kerdî û vat: “Ganî tifaqê Cumhurî sey pê têbigêro. Ganî proses sînoranê teng de nêro girewtene û bi hesaban şenik û menfaatanê partîye ser o nêro sînorkerdene. Rayerberîya Tirkîya cîdîyet wazena. Waştişê dewlete zî wina erjan nîyo.”
