Girewteyo nêweş Mehmet Salih Fîlîz ke Hepîsxaneyê Ewleyîya Berze yê Îzmîr de yeno girewtiş, da zanayene ke demo ke ey seba tedawî berdo nêweşxane, leşkeran dayopiro û bi halê xo yê birîndarî zî bi rojan sewqê nêweşxaneyî nêbîyo.
Girewte Mehmet Salîh Fîlîz ke Hepîsxaneyê Ewleyîya Berze yê Îzmîr de yeno girewtiş, pêvînayîşê telefonî yê keyeyê xo reyde eşkera kerd ke 30ê nîsane de wexto ke leşkeran ey berdo Nêweşxaneyê Yeşîlyurdî nenge û heqaretê ey kerdo û dayo ey ro.
Demo ke leşkeran girewteyo nêweş Mehmet Salih Fîlîzî berdo beşê goşan, pirnike û qirike, kelepçeyê ey nêakerdo û nêverdayo o tedawî bibo. Mehmet Salih Fîlîz nê agahîyî da keyeyê xo: “Nengî çînayêne. Vatişê xirab û heqaretê mi kerdênê. Doktorê beşê goşan, pirnike û qirike waşt ke kelepçe bêro akerdene, leşkeran kelepçe nêakerd û vat ma nêverdenê wina tedawî bibo. Mi nêwaşt ez bi kelepçeyan tedawî biba, leşkeran da sîneyê mi ro û hêrişê mi kerd. Vernîya doktorî de da mi ro. Dima ra hetanî qata cêrine da mi ro. Verê derencaya şewatî de zî kamera girewte û reyna hêrişê mi kerd. Da sere û paştîya mi ro. Mi berd odayêka qij û bi jopan hêrişê mi kerd. Demo ke ma ameyê hepîsxane saete nêzdîyê 3 bî, mi waşt ez doktorî bivînî. Seba ke herinda derbanê bedenê mi vindî biba, hetanî saete 7 mi erey vist. Dima ra mi berd Nêweşxaneyê Dewlete yê Seyfî Demîrsoyî. Mi doktorî ra vat leşkeran hêrişê mi kerdo, astsubay vat zuran keno. Doktorî raporêk nuşt la raporêko baş nêbi. Raporo ke nuşt mi 4ê Gulane de erşawit Meclîs, ÎHD û mi leşkerî şîkayet kerdê.”
Mehmet Salih Fîlîzî îfade kerd ke ey 5ê gulane de dozgerî de pêvînayîş kerdo û dozgerî ra vato: “Leşa mi de hema zî cayê derban est o. Ez nêeşkena bi rehetî têbigêra. Roja yewşeme, 3ê gulane ez aciz bîya û mi veng da îdareyî. Ambulans ameye la mi nêberd nêweşxane. Mi waşt ez şêra revîr, mi nêberd. Paweyî ke cayê derban weş bibê.”
Mehmet Salih Fîlîz kam o?
Serra 2016î de Mêrsîn de ame girewtiş û destbendkerdene, dima ra hetê Mehkemaya Cezayanê Giranan a Mêrsîn a 2. ra 17 serrî û aşmêk û 15 rojî cezaya girewtişî ey rê ameye dayîş.
Derheqê rewşa Fîlîzî de, Komîsyonê Weşî yê Nêweşxaneyî raporêk hedre kerd. Raporî de, Beşê Romatolojîyî eşkera kerd ke nêweşîya ey nêweşîyêka korînk a û ganî bêro dermankerdene û kontrolêko biserûber seba ey bêro kerdene. Beşê Gastroenterolojîyî zî eyn çî vatê.
Fîlîz, rixmê raporê doktorî zî nêameyo veradayene û ey erşawito Îzmîr.
