Kulturê dengbêjîye bi seyan serran o Kurdîstan de esto û vera amûr û averşîyayîşê teknolojîyî de zî xo ver dano. Dengbêj Îkram Koç zî bale ante averşîyayîşê teknolojîyî ser û dîyar kerd ke, vera nê heme çîyan zî dengbêjîye xo pawito û vîndî nêbena.
Kulturê Kurdan de dengbêjîye tena vatişê kilaman nîya, eynî wextî de vatena tarîxî ya. Dengbêjanê Kurdan serebutê ke bîyê şahid yan zî eşnawitê, bi raya dengbêjîye heta ewro ard o. Aye ra dengbêjîye mîyanê Kurdan de cayê de zaf taybet û gird gêna. Her çiqas medyaya dîjîtale û şert û mercê neweyî tesîr serê kulturê dengbêjîye bikero zî, xeylê kesî hema zî nê kulturî pawenê. Dengbêj Îkram Koç o ke qezayê Payîzava ya Wanî ra yo û mîyanê keyeyê dengbêjan de bîyo pîl, her wext bi kilam û kulturê Kurdkî de bîyo pîl. Îkram Koç vano ke ey kulturê dengbêjîye keyeyê xo ra gîrewto.
‘Mehmûdê Çelo bi kayan dengbêjîye nîşanê ma dano’
Dengbêj Îkram Koç behsê cuya xo yê dengbêjîye kerd û va ke babîyê ci dengbêj bîyo û hem kilamê dengbêjîye hem zî lawikê govende vatêne. Îkram Koçî ard ziwan ke ey dengbêjîye babîyê xo û komelê dewijan ra gîrewta û wina va: “Min kilamê dengbêjîye û lawikê govende bi xo viraştêne û vatêne. Xortîya xo de wexto ke ez dekewtêne govendê, min eşkeyêne 3-4 saetî têdima kilaman vajî. Bi saya dengbêjîye ra Kurdbîyayîşê ma vîndî nêbeno û hema zî dewam keno. Mintiqaya ma de dengbêjê zaf pîlî estbî. Mehmûdê Çelo estbi, ey hetê yew axayê nê herêmî de dewe bi dewe gêrayêne û serê serebûtan kilamî vatêne. Wexto ke amayêne dewa ma, domanî top kerdêne û bi kay û govende dengbêjîye nîşanê ma dêne. Ma dengbêjîye înan ra gîrewte. Labelê çi heyf ke ewro cahîlîyê de pîle esta û tayê kesî dengbêjîye sey gêjbîyayiş, yan zî aqil ra kemî mendene vênenê. Vera nê nêzdibîyayişanê kemîyan zî dengbêjîye xo pawito û ma zî da dewam kerdene.”
‘Dengbêjîye vinî nêbena’
Îkram Koçî bale ante averşîyayîşê teknolojîyî û vejîyayîşê înternetî ser û wina va: “Vejîyayîşê telefon û înternetî tesîrê de pîl hem bi heto rind ra hem zî heto nêrind ra serê dengbêjîye kerd. Ciwanî nika rûyê xo vera dengbêjîye çarnenê û ci ra hes kenê. Labelê vejîyayîşê lawikanê bînanê ke kulturê ma ra yê, tayêna bala şarî ancenê. La ez bawer keno ke kulturê dengbêjîye vîndî nêbeno. Bi paştdayîşê şarî û çapemenîye, no kultur do serê lingan de bimano.”
