Hemşaredarê Sêrtî Mehmet Kaysîyî vat: ”Sere de şarê ma, ma venga her beşê komelî danê ke xo ver bidê û têkoşîn bikerê. Roje roja wayîrvejîyayîşê îrade û şaredarîya xo ya.”
Hemşaredara Sêrtî Sofya Alagaş rê cezaya zîndanî ya 6 serran û 3 mengan dîyabî û dima Şaredarîya Sêrtî amebî xespkerdene. Herinda hemşaredaran Sofya Alagaş û Mehmet Kaysîyî de qeyûm ame tayînkerdene.
Hemşaredarê Sêrtî Mehmet Kaysîyî derheqê destsernayîşê şaredarîye de ajansê ANF’î rê qisey kerd û vat: ”Cezaya 6 serran û 3 mengan dîyaye hemşaredara ma. Hinî bawerîya ma bi mehkemeyan çin a. Na ceza keyfî ya. Serê sibayî saete 06.00 de seke welatêkî îşxal kenê dekewtî şaredarîya ma. Înan dest na şaredarîya ma ser.
Îqtîdarî îradeyê şarê Sêrtî çin hesibna. Qeyûm seba ma yeno manaya talan û dizdîye. Hîrê qeyûmanê verênan zî qetî xizmetê şaredarîye nêkerd. Hîrê reyê bînî zî qeyûm tayînê şaredarîye bibo şarê ma û ma do qebul nêkerê. Şarê Sêrtî sereyê xo nêard war û do nêaro. Wextê weçînayîşan de 8 weçînitoxê bêusûlî ameyî ardene tîya la ancî zî ma ser kewtî. Ma do ancî ser bikewê, têkoşînê xo rê dewam bikerê.”
Kaysîyî venga partîyanê sîyasîyan, temsîlkaranê rêxistinanê komelê sivîlî da ke bi xoverdayîşî cewab bidê destsernayîşê îradeyî û vat: ”Heta çilka peyêne ya gonîya xo ma do wayîrê îradeyê xo vejîyê. Ma do şaredarîye ra fek vera nêdê. Sere de şarê ma, ma venga her beşê komelî danê ke xo ver bidê û têkoşîn bikerê. Roje roja wayîrvejîyayîşê îrade û şaredarîya xo ya.”
