Çewlig de operasyonê narkotîkî de yew xetaya skandale ameye meydan. Polîsan bi şaşî eşt serê keyeyêk û keyede harmeyê yew gedeyî şikit, kesê zereyê keyî birindar kerdî û zirar da keye ra.
Mehlaya Uydukentî de, wextê şafaqî de polîsanê narkotîkî operasyon kerd. Ekîbanê polîsan keyeyêkê Kanîreşijî kerd hedef. Berê keyeyi bi koçbaşî şikna û bi bombaya sîsî eşt zerrê keyeyî. Polîsanê ke eşt keyeyi ser, bi zor û teda mudaxeleyê şarê keyeyî kerd. Na mudaxele de harmeyê domanêkê 15 serrî şikîya.
Adrese şaş vejîya
Badê operasyonî fam bî ke polîsan bi şaşî eşto nê keyeyî ser. Mudirê Emnîyetê Çewlîgî û tayê rayberî şîyê hetê na keyeye û înan ra uzrê xo waşt. Rayberan va: “Her çi fîzîkî ke ameyo şikitiş û zerarê ke ameyê meydan, dewlete do bido.”
Tehdît û raporê derbî
Goreyê îdîayan; mîyanê heyetê emnîyetî de polîsêkî keye tehdît kerdo û vato:
“Eke şima dawayê xo ra anêvêrê, embazê ma yê ke operasyon de bîyê do wezîfe ra bêrê eştiş.”
Bi nê qiseyan waşto ke keye dawayê xo ra agêro. La keye seba şikîtişê harmeyê domanê xo, nêweşxane ra raporê derbî girewt û seba huquqî xebatê xo dayî destcikerdene.
