Rayberîya Hepisxaneyê Bakirkoyî bi manayê “silam dayo girewteyan”, aşmêk pêvînayîşê Ferhat Yildiz, Fînce Akman û Firat Kayayî qedexe kerd. Ferhat Yildiz û Fînce Akman ke înan rê ceza ameya dayîş, vat: “Girewteyê bînî zî sey merdimanê ma yê. Çend ceza bidê ma, ma do her tim silam bidê yewbînan.”
Ferhat Yildiz, Fînce Akman û Firat Kaya 12ê gulane de reyna şîyê hepisxane û waşt ke merdimanê xo yê ke Hepisxaneyê Cinîyan ê Bakirkoyî de yenê girewtene, înan reyded pêvînayîş bikerê. Labelê rayberîya hepisxaneyî pêvînayîşê înan qedexe kerd. Ferhat Yildiz, Fînce Akman û Firat Kayayî ney ser o muracatê rayberîya hepisxaneyî kerd. Rayberîya hepisxaneyî dîyar kerd ke, seba ke înan pêvînayîşê hewteyê verêne de silam dayo girewteyanê bînan, pêvînayîşê înan seba aşmêk ameyo qedexekerdene.
‘Girewteyê bînî zî sey merdimanê ma yê’
Ferhat Yildizî dîyar kerd ke înan rîyê qedexeyî ra 12ê gulane de nêênayo merdimanê xo bivînê û vat: “Maya mi Hatîce Yildiz di serrî yo ke Hepisxaneyê Bakirkoyî de ya. Maya mi rê bi manayê ‘girewteyan rê pererşawitê’ 4 serrî ceza daye. 12ê gulane de seba pêvênayîşî ma ez şîya hepisxane labelê gardîyanan ma ra vat, ‘şima nêeşkenê bikewê cayê pêvînayîşî’. Firat Kaya, Fînce Akman û mi rê pêvînayîş qedexe kerdo. Sebebê qedexeyî zî no yo; hewteyo verên dimayê pêvînayîşî ma şîyê maseyanê bînan, ma silam dayo girewteyanê bînan û ma înan reyde qisey kerdo. Bi nê manayî pêvînayîşê ma aşmêk ameyo qedexekerdene. Ma uca de vera nê halî reaksîyon mojna û ma vat, ‘Ma nê qerarî qebul nêkenê. Girewteyê bînî zî sey merdimanê ma yê. Ma zî nê semedî ra rewşa înan pers kerd.’”
‘Çend ceza bidê, ma do reyna zî silam bidê yewbînan’
Fînce Akman dîyar kerd ke dimayê reaksîyonê înan gardîyanan vato ke semedê silamdayîşî pêvînayîş ameyo qedexekerdene û qiseykerdişê xo wina domna: “Ma salone de girewteyanê bînan ra nêzdî yê. Maseyî nêzdîyê yewbînan ê. Wexto ke ma vêrenê, ma silam danê yewbînan û vanê ‘Şima senîn ê?’. Silamdayîşê ma, vatişê ma yê ‘Şima senîn ê?’ kerdo manayê qedexeyî. Pêro girewteyî merdimê ma yê. Hewteyo verên gardîyanî wextê pêvînayîşî de sereyê ma ser o gêrayêne. Ma fehm kerdbi ke ê do çîyêk bikerê. Nika ma do senî vatişê ‘aştî’ ra bawer bikerê? Ma ra vanê silam medê yewbînan. Nê meseleyî şenik nîyê, ma nê çîyan qebul nêkenê. Çend ceza bidê ma zî, ma do her tim silam bidê yewbînan.”
