Hemşaredarê Sêrtî Sofya Alagaş û Mehmet Kaysî ke Wezaretê Karanê Zereyî tayînî cayê înan kerd, dîyar kerdê ke no qirar nas nêkenê û vatê: “Ma no qerar qebûl nêkenê. Hetanî peynî ma do xover bidê. Do hewna nêeşkerê bi serbikewê.”
Wezaretê Karanê Zereyî qeyîm tayinî Şaredarîya Sêrtî ya DEM Partîye kerd. Dima qeyûm tayinî şaredarîye hat kerdene Hemşaredar Sofya Alagaş û Mehmet Kaysî wezîfeyê xo ameyê dûrvistine û cayê înan di Walîyê Sêrtî Kemal Kizilkaya wezîfedar kerdê.
Reaksîyonê şarî verba tayînkerdişê qeyûmî domyeno. Her roj şarê Sêrtî bi hemşaredarê xo verê awanîya şaredarîye qerarê qeyûmî protesto kenê. Hemşaredarê Sêrtî Sofya Alagaş û Mehmet Kaysî zî her roj bi welatijê Sêrtî ra verê awanîya şaredarîye reaksîyon nîşanî qerarê qeyûmî danê û mîyanê çalakîyan de ca gênê. Hemşaredar Sofya Alagaş û Mehmet Kaysî derheqê tayînkerdişê qeyîmî yê şaredarîye ajansê ma rê qise kerdê û reaksîyon nîşanê qerarî dayê.
‘Qerarêko sîyasî yo’
Sofya Alagaş ard ziwan ke seba kar û xebatê rojnamegerîye ceza ci rê ameyo birin û wina va: “Doza mi dewam kerdêne. Mîyanê dosya de zaf kêmaneyî estbî. Wa na kêmaney biameynî temamkerdiş la mahkeme nê kêmaney ver çiman nêgirewt û lezûbez qerarê ceza da. No qerarêko sîyasî yo. Xo ra demê bîya hemşaredar zî seba qeyûm bierzê xo ra kerdê semed. Nêzdîbîyayişê heyetî yê mahkeme ma zananê ke talîmatêko sîyasî girewtê. Kêmaneyê mîyanî yê dosya de zî bilezûbez na ceza dayê. Bila mahkeme nêvaja ma goreyê huquqî hereket kerdê. Ê goreyê talîmatê hereket kerdê, no qerar verba îradeya şarê kurd o. Verba îradeya ciwan û cinîyan a, verba îradeya şarê Sêrtî û şarê kurd a. Dişmenîya seserran a.”
‘Hetanî peynî ma do xover bidê’
Sofya Alagaş dewamê qiseyê xo de destnîşan kerd ke ê do verba qerarê qeyûmî têkoşînê xo bidomnê û wina dewam kerd: “Ma no qerarî nas nêkenê. Ma no qerarî qebûl nêkenê, hetanî peynî ma do xover bidê. Bi nêvajê ê do no qerar qebûl bikê. Çi pêardişê înan ê lêşîn bibî ma do bivejnê werte û teşhîr bikê. Hîna di rojê ser masa ronişto û 2 otobusê ke seba lazimîye ma dabî Misircî anto. Seba ke na şaredarîya DEM partî ya, dişmenîya xo domnena. Ti heqê înan uca de çîn o, bi rihetî nêeşkeyo Sêrt de bigêro, bi hezar kesî ra gêreno û seba ke terseno.”
Ma bi ferqê 2 hezar ray bi ser kewtê
Mehmet Kaysî zî dîyar kerd ke raya 3îne qeyûm tayînî Şaredarîya Sêrtî ameyo kerdene û no qerar huquqî nîyo û wina va: “Bi no qerarî vanê şima kurd ê, no ser zî warê sîyasî şima rê qedexe yo. Ma 2 rayan hetê şar ameyê weçînayiş. Desthilat hetêk qalê pêvajo keno û heto bîn zî tayînkerdişê qeyûman domneno. Ma do wayîrê îradeya xo bivejê, 40 serrê destê înan çi ameyo înan kerdo la nêeşkenê biserkewê. Vengdayişê mi şarê ma yê Sêrtî, şarê kurd, ereb û tirkan o yo ke wayîrê şaredarîya xo, wayîrê îradeya xo bivejê. No zilm o, heqeret û bêhuquqî yo.”
