Hemverfekê ANYAKAY-DER’î yê Herêma 3. yê Stenbolî Osman Ozdemîr derheqê 18ê Gulane Roja Şehîdan de îfade kerd ke aşma Gulane de xeylî cangorî virazîyayê û înan şarê Kurdî ardê roja ewro û vat: “Ma bi saya şehîdan serêberz ciwîyenê. Şehîdê aşma Gulane ma çînbîyayîş ra ardê estbîyayene. Ma do amancê xo bi saya şehîdan û Serekî bi ca bîyarê.”
Têgêrayîşê Azadîya Kurdîstanî sey têgêrayîşî şehîdan yeno pênasekerdene. Seba azadîya Kurdîstanî bi hezaran kesî canê xo feda kerd. Wexto ke aşma gulane yena, şehîdê têgêrayîşê Kurdîstanî yenê vîrardene. Aşma gulane de pêşengê Têgêrayîşê Azadîye; Heqî Karer, Eşref Anyik, Ferhat Kurtay, Mahmut Zengîn, Necmî Oner, Mehmet Karasungur û Halîl Çavgun cuya xo ra bîyî. Loma aşma gulane sey aşma şehîdan yena zanayene. Hemverfekê Komeleya Hetkarî û Paştdayîşî Keyeyê Merdimanê Vîndîbîyayan ya Anatolyayî (ANYAKAY-DER) ra Osman Ozdemîr derheqê 18ê Gulane Roja Şehîdan de qisey kerd.
‘Ma bi xoverdayena ê qehremanan resayê na merhela’
Osman Ozdemîrî diyar kerd ke aşma gulane de cangorîyê Kurdîstanî yenê vîra înan û vat: “Aşma Gulane aşma qehreman û xoverdayoxan a. Şehîdê, şarî Kurdî çînbîyayîşî ra ardê na roje. Şehadetê Heqî Karerî ser o, Têgêrayîşê Azadîya ame awankerdene. Şehîdê aşma gulane şehîdî pîroz ê. Îbrahîm Kaypakkaya zî bi xoverdayîşê xo gureyê muhîmî kerdê. Îbrahîm Kaypakkaya zî şehîdê aşma gulane yo. Cangorîya Çaran û Mehmet Karasungur şehîdê gird ê, xeylî kesî aşma gulane de şehîd kewtê, ê şehîdan ama ardê na roje. Bi saya înan ewro têgêrê ke ameyê awankerdene, bîyî hezaran û no proses ameyo dest pêkerdene. Ma bi xoverdayena ê qehremanan resayê na merhela.”
‘Ma do amancê xo bi saya şehîdan û Serekî bi ca bîyarê’
Osman Ozdemîrî îfade kerd ke dewleta Tirkîye badê serewedaritişê Agirî de goristanêke sembolik viraşt û vat ‘Kurdîstano Xeyalî tîya de binerd kerde yo: “O goristan bi têkoşînê şehîdan ame puç kerdene. Şarê Kurdî bi nê têkoşînan, haya bi û xo nas kerd. Verê çalakîyan Zindanê Amedî de, Kurdêke/î nêeşkenê bi vatêne ez kurd a. La ewro ma bi saya şehîdan serêberz cuyenê. Ma do amancê xo bi saya şehîdan û Serekî bi ca bîyarê.”
‘Ganî aqûbetê vîndîbîyayan bêro eşkerakerdene’
Osman Ozdemîrî ard vîr ke şarê Kurdî xeylî dejî antê la her wext xo ver dayo û qiseyê xo wina domna: “Esteyê gedeyanê ma qutîyan de dayê ma. Dezgeyê ma zî têkoşînê gedeyanê xo domnenê. Bi seyan keyeyê ma estê ke aqûbetê gedeyanê xo nêzanê. Ma zî sey ANYAKAY-DER’î wazenê aqûbetê kesanê vîndîbîyayan vejê meydan. Ganî dejê zerrîyê dayîkan bêro şenikkerdene. Ganî dewlete komeleyanê vîndîyayan esas bigêro ke aqûbetê kesanê vîndîbîyayan bêro zelalkerdene.
No hêrişo bêrûmet vera keyeyanê ma bi. Nê çîyî ra giranêr çîyêk çin o. Eke aştîyêke birûmet virazîya, ganî aqûbetê gedeyanê vîndîbîyayan bêro eşkerakerdene. Seke yeno zanayene 18ê Gulane ‘Roja Şehîdan a’ ma do sey ANYAKAY-DER’î, Stenbol de 3 qezayan de, Sancaktepe, Beyoglu û Bagcilar de, programê vîr ardene organîze bikerê.
