Rojnameger Oznur Deger û Osman Akinî rê seba ke îşkence kerdibi xebere, ceza ameye waştiş.
Mudira Xeberan a JINNEWS’î Oznur Deger û rayberê karanê nuştişî yê rojnameyê Yenî Yaşamî yo verên Osman Akinî rê ke seba 16ê temmuza 2026î de îşkenceyê fermandarê cendirmeyan Kamîl Aksoyî yê dewaya Marîne ya girêdayeyê qezaya Nisêbîn a Mardînî de kerdibi xebere ceza ameye waştiş. Bi gerreyê Kamîl Aksoyî derheqê rojnamegeran de dewa ameye akerdene. Roniştişo 2. yê dewa, ewro Mehkemaya Cezayanê Giranan a 2. ya Mardînî de ame viraştene. Dozger waşt ke rojnamegerî bêrê cezakerdene. Avûkatê Oznur Deger û Osman Akinî roniştişî de hedre byêî.
Dozgerî mutalaya xo pêşkêş kerd û waşt ke rojnamegerî bi îdiaya “nîşandayîşê kesê ke şerê vera terorî de wezîfedar ê” bêrê cezakerdene. Heyetê mehkema seba pawitişê bêrê girewtene, dewa taloqê 16 hezîrane kerd.
Se bibi?
Serekê Tabûrê Komandoyê yê cendirmeyan Kamîl Aksoy dewa Marîne ya girêdayeyê qezaya Nisêbînî ya Mardînî de eştişê serê keyeyî de îşkence wayîrî keyeyî kerdibi. Rojnameger Oznur Deger û Osman Akinî îdia û caardişê îşkenceyî kerdibî xebere. Bi gerrêyê Kamîl Aksoyî Serdozgerîya Mardînî tehqîqat da dest pêkerdene. Îdianame ameye hedrekerdene û hetê Mehkemaya Cezayanê Giranan a 2. ya Mardînî ra ameye qebulkerdene. Ewro roniştişo 2. yê dewa ame viraştiş.
