Birayê Rojwelat Kizmaze, Mehmet Kizmazî dîyar kerd ke yeno vatene ke dosyayê faîlanê nedîyar do bêrê akerdene û dosyaya Rojwelate zî faîlê ci nedîyar o û vat: “Gerek dosya de qerarê ‘lazim nîyo kê bidê dima’ bêro hewanayene. Pisporê Tibê Edlî ma ra vat ‘Rojwelate dima ke bîya vîndî, 3 rojî weş menda û dima dinyaya xo bedilnaya.’ Waya mi 3 rojî weş menda. Nê 3 rojan de se bi? Ma zanê ke çi çîyo ke Kurdîstan de beno, pêro yewbînan reyde girêdaye yê.”
Rojwelat Kizmaz û Gulîstan Doku pîya Unîversîteya Munzurî ya Dêrsimî de beşê mamostetîya sinifî wendêne. Rojwelat Kizmaze 9ê sibata 2024î de Taxa Petrolî ya Êlihî de bîye vîndî û dimayê 3 rojan, 12ê sibate 2024î de badê ke cenazeya aye Awbendê Ilisuyî yê Heskîfî de amebî vînayene. Mergê Rojwelat zî sey yê Gulîstan Dokuye sere de ame vatene ke ‘xo kîşto.’ Dima ke kiştoxê Gulîstan Dokuye ameyê tespîtkerdene, keyeyê Kizmazî zî wazeno mergê Rojwelate bêro roşnîkerdene. Birayê Rojwelate, Mehmet Kizmazî serê na babete de qisey kerd.
‘Zaf persî û gumanî sereyê ma de est ê’
Mehmet Kizmazî îfade kerd ke inan dima ke dewaya Gulîstan Doku de averşîyayîş bi, reyna waştişnameyo newe dayo û vat: “Ma waşt ke qerarê ‘lazim nîyo merdim bikewê dima’ bêro hewanayîş labelê hema zî qet cewab nêdayo ma. Waştişê ma yo bîn zî seba nê 3 rojanê ke Rojwelat vîndî bîya û berpirsîyaran karê xo nêkerdo û Dêrsim de çi ameyo serê aye, bi. ewro persê ma bêcewab ê. Wexto ke waya mi dinyaya xo bedilnaye ma waştişname da labelê qebul nêkerd. Zaf gumanî sereyê ma de est bî. Ma vat belkî semedê aborî bo, yan zî çîyo ke ame serê Gulîstan aye ser o tesîr. Labelê ma vatênê xo nêkişto. Dewa de vîdeoyê kamerayî est ê. Yew Çatrayîrê Tupraşî yê Êlihî de demo ke wenîşena wesayît, yewo bîn zî Heskîf de verê lîmanî de yo.”
‘Rojwelate dima ke bîye vîndî 3 rojî ra pey dinyaya xo bedilnaya’
Mehmet Kizmazî vat waya ey roja îne keye ra vejîyaya û vat: “Pisporê Tibê Edlî ma ra vat, ‘Rojwelat dima ke bîya vîndî 3 rojî weş menda’. Waya mi 3 rojî weş menda, nê 3 rojan de se bi? Ma dî ke Walîyê Dêrsimî seba xo û domanê xo bîpawo bi hêzê dewlete se kerd. Seba ma 3 rojî tu çî nêkerd, seba ke keyeyê ma polîtîk o tu çî nêkerd. Ma sey merdiman nêhesibnayê. 3 rojî tay nîyo. Cayo ke badê ke waya mi awe ra vete, uca de kulubeya leşkeran est a. 24 saetî uca de nobet tepîşenê. Nuqteya kulubeyî û cayo ke waya mi ameya kiştene zaf nêzdîyê yewbînan ê. Senî 3 rojî uca de tu kesî aye nêdîye? No dosya de nêaseno.”
‘Ma bi xo gêrayî û kinc û solê aye dîyê’
Derheqê mobesseyan de zî Mehmet Kizmazî dîyar kerd ke înan ra vato Mobesseya Lîmanê Heskîfî xirabe ya u wina domna: “Nozî seba ma zaf muhîm o. Keyeyê ma Taxa Îpragazî ya Êlihî de yo. Ciwantîya mi de wexto ke çalakîyêk bibîyênê bi mobesseyan mîyanê saetêk de tespît kerdênê. Nika vanê a kamera xirabe ya. Gerek polîsan xebere bidayênê leşkeranê Heskîfî labelê ma tena şîyî û ma xebere daye înan. Ma bi xo Heskîf de kinc û solê Rojwelat dîyê. Wexto ke ke ma kinc û solî dîyî, badek botî xebitnayê.”
‘Şikitiş Dêrsim de bi’
Mehmet Kizmazî ard vîr ke çi çîyo ke Kurdîstan de beno pêro pîya girêdayeyê yewbînan ê û vat: “Waya mi zî Gulîstan Doku zî nêgêrenê labelê ma wazenê bimusê ke çi ameyo serê înan. Ma wazenê bimusê ke Dêrsim de çi ameyo serê waya mi, çunke şikitiş uca de bi. Ma fîkirîyenê ke belkî uca de zî çîyêk ard serê Rojwelat. Çunke hedîse zî şaristan zî eynî yo. Gulîstan, Rojwelat û Rojîn wendekarê beşê mamostetîye bîyê û gedeyan ra hes kerdêne la nê çîyî ard serê înan. Eynî hîkaye û eynî babet. No cografyaya ma de ma de çarenûs nîyo.”
