Hemserekê Pêroyî yê DEM Partî Tuncer Bakirhanî dimayê kombîyayîşê Serekê Pêroyî yê CHP’yî Ozgur Ozelî reyde dîyar kerd ke ê mudaxaleyê bi destê hukmî rewa nêvînenê û vat: “Ma na bawerîye de yê ke CHP eşkena nê prosesî bi kongreyêka demokratîke derbas bikera.”
Hemserekê Pêroyî yê DEM Partî Tuncer Bakirhan û heyeto ke Verfeka DEM Partî Ayşegul Dogan, Serekwekîlê Grûba DEM Partî Sezaî Temellî û Cagirê Hemserekanê Pêroyî yo ke Rayberîyanê Herêmî ra berpirsîyar o Mehmet Ruştu Tîryakî ra ameyêne pê, seba qerarê ‘Betalkerdîşê teqezî’ meclîs de şîyê zîyaretê grûba CHP’yî. Tuncer Bakirhan û heyeto ke ey reyde bi pîya Serekê Pêroyî yê CHP’yî Ozgur Ozelî yo ko karê xo ra amebi dûrîvistene, ey reyde kombîyayîşêk kerd. Nê kombîyayîşî de Serekwekîlê Grûba CHP’yî Murat Emîr û Cagirê Serekê Pêroyî yê CHP’yî Sezgîn Tanrikulu zî amade bîyî.
Dimayê kombîyayîşî heyetê DEM Partî û CHP’yî eşkerayîyêka hempare daye.
Ewil Ozgur Ozelî qisey kerd û vat ke meclîs nika seba merkezê pêroyî yê CHP’yî rê mêmandarîye keno û wina domna: “Ma tîya de kar û xebatanê xo zî kenê. Ma ewro zîyaretêko zaf bimane zî qebul kerd. DEM Partî ke dimayê CHP’yî partîya ke wayîrê tewr zaf kursîyan a meclîs de, ma zîyaret kerd. Ma seba nê zîyaretî sipas kenî.”
‘Ma tu mudaxaleyêkê teberî rewa nêvînenê’
Tuncer Bakirhanî zî îfade kerd ke kombîyayîşê înan pozîtîf vîyarto û nê çîyî pare kerdî:
“Bi qerarê betalkerdişê teqezî, sîyasetê Tirkîya reyna zereyê krîzî de yo. Vîdeoyê vizêrên ê ke bi zor polîsî kewtî zereyê merkezê pêroyî yê CHP’yî, şermêko zaf pîl bi. Ma nê hêrişî şermezar kenî û qebul nêkenî. Her ke bêhuqûqîye pîl bibê, cîyakarîya zereyê komelî de zî zêde bena. Gerek ma wayîrîye demokrasî rê bikerê. Sebebê na rewşe, kêmbîyayîşê demokrasî ya. Xelasîya na rewşe ra zî o yo ke rejîm demokrat bibo û huqûqî esas bîgîro. Dînya de hedîseyê muhîmî virazîyenê. Ganî Tirkîya nê prosesî de enerjîyê xo seba krîzanê sîyasetî xerc nêkera û aştîya komelkî domdare bikera. Rayîrê ey zî edalet û huqûq o. Wexto ke edalet û huqûq çin bo, aştîya komelkî zî bi hawayêk zerar vînena. Ma hêvî kenî ke CHP nê prosesî de hemkarîya xo bipawa û bi hawayêko serkewte zereyê xo de çareser bikera. Helwêstê ma şênber o. Partîyêk ganî bi destê hukmî nê, bi destê xo û îradeyê xo her çî bîyara ca. Ma tu mudaxaleyêkê teberî rewa nêvînenê. Ma na bawerîye de yê ke CHP eşkena nê prosesî bi kongreyêka demokratîke derbas bikera. Ma reyna silametîye wazenî.”
