Erdlerzî dir bi hezaran kesî dinyaya xo bedelnayî û bi hezaran kesî bi nêweşîyê fîzîkî û psîkolojîk kewtî. Doktore Gul Tanik va ke nê nêweşî semedê îhmalkarî vejîyayê werte û dîyar kerd ke no proses çiqas lez biqedîyo do nêweşî zî hende kêmî bibê.
Badê erdlerzê 6ê sibate virazîya de rijyayîşêk pîl vejîya werte û merdimî derbazê kon û konteyiran bîyî. Nê herêman de erdlerzî problemê weşîye yê giran ciwîyayî û eynî wextî de problemê awe û ceyranî zî est ê. Pêwa di serrî erdlerzî ser o derbazî bî hema zî bi deshezaran kesî konteyniran de yê.
Çadiran de problemê pîlî û muhîmî
Goreyê xebera Jinnewsî Doktore Gul Tanik dîyar kerd ke sereyê prosesî de ameya herêma erdlerzî û vat: “Ez demêk zaf xirabî de ameya tîya. Serê aşma adare ra nata tîya û ma mîyanê xirban de şuxilênê. Hekîma Keyeyî yê bajarê konteynirî ya. Wexto ke ez ameya konteynir çinbî, tena çadirî estbî. Problemê çadiran û dermanan estbî. Bêtehamulîyê însanan hemverê vengan de estbî. Elektrîk zî çinbî, ma mîyanê nê şert û mercan de şuxilîyayîne. Xeylê cinî pisporê weşîye yê cinî tercîh kerdêne. Cinî tewr zêde zehmetî antêne Cystitis (Enfeksiyonê rayîrê mîzî) bî. Herême de tuwaletê guncav çin bî. Tuwaletê hempar, pêroyî ameyî awankerdiş. Problemo bîn zî ger bi. Kesê ke aşmêke xo nêşûtîbî estbî. Semedê germbîyayîş zêde bî, timî bedenê înan hekîyayîne.”
Problemê cinîyan dewam kenê
Gul Tanik bale ant serê problemê ke cinî ciwîyenê û na babete de wina vat: “Erdlerzî de cinîyê diganeyî xeylêk zehmetî antî. O wext nêweşxane nêşuxilîyayîne. Cinîyê diganeyan rê zehmet bî. Semedo ke diganeyî di cuye dewam kenê. Cinîyêke normale ra hîna zêde nêzdîyê mergî yê. Nê semedî ra mabêne înan de vurnayîşêk di hetî est o, semedo ke pitik raste rast cuya înan ser o tesîr keno. Coka heta destê ma ra ameyîne ma giranî dayîne cinîyanê diganeyan. Wexto ke ma reyke bîn ewnîyenê, nê prosesî de xeylêk kar cinîyan ser o kom bîyo. Cinî mecbûr mende ke firaq û cilan keye de bişûyê, la awe çinbî. Coka zî cinî zaf bî rincan. Mi dî ke cinî hetê psîkolojîkî ra tesîr bîya û hemverê vengê berzî bêtehemûl bîyê.”
Herême de hûmara doktoran kêm bî
Gul Tanik da zanayîş ke bajar xizmetê weşîye de qels ê û wina vat: “Bajar de psîkolog û psîkiyatrîst kêm bî. Ma hewl da ma xo biresnê pêro kesan. Hevalê psîkologî ameyî û dest bi xebatan kerdî. La ancî zî qels bî. 10 doktor bîyayîşê yew tena psîkolog bî. Bi taybetî tutî pir bi tesîr bîyî. Tersa bî. Vengê berzî ra tersayîne.”
‘Erdlerzî de îhmalkarî estbî’
Gul Tanik tewr peyîn wina vat: “Ma do 2 serrî temam bikerê û hema zî lazimîyê ma kêmî yê. Birnayîşê ceyran û awe est o. Şertê pakî zî kêmî benê. Erdlerzeyî vanê ke hîrê rojî tena mendê. Vanê nê prosesî de dewlete çinbî. Ez nika bajarê konteyniran ra yena û problemê ma yê awe û ceyranî dewam kenê. Bajarê konteyniran de sobayê elektrîk û klîma est ê. Konteynir asin o. Wexto ke serd bo û elektrîk bibiryo, merdim zereyê asinî de di teber ra 10 qat zêdeyêr serd hîs keno. Çiqas ceyran şêro hende nêweşî zî zêde benê. Her ke awe yena birnayîş, goreyê şert û mercê pakitî nêweşî hîna zêde benê. Bêguman ma nêzanê no proses do heta key dewam bikero, la eke no proses kêmî bibo û cuye açaryo rewşa asayî, bêguman nêweşî zî do kêmî bibê.”
