Mojtaba Waîsî ke hetê rejîmê Îranî ra amebî qetilkerdene, seba gedeyanê kitabxaneyê ey û birayê ey Maysam Waîsî awan kerdbî gedeyê ke tede perwerde vînenê înan rê mektubêke nuştbî. Badê qetilkerdena ey Mektubê Mojteba Waîsî ame weşanayene.
Mojteba Waîsî ke 28ê gulane de hetê hêzanê rejîmî Îranî ra birayê xo Maysam Waîsî reyde keyeyê ke tede mendênê de ameyê qetilkerdiş. Mojteba Waîsî gedeyanê ke kitabxayenê ey û birayê ey de perwerde vînenê înan rê mektubêke nuştbî, ame weşanayene.
Mektuba ke Mojteba Waîsî gedeyan rê nuştbî wina ya:
“Ge-ge hîsê mi, ver bi nê kitabxaneyî ra firayenê ke rihê mi seba kitaban basqan dano pêrodayene. Ez bêrîyê her gedeyê kitabxaneyî kena: Mêhîya, Mahbûb, Sena, Aylîn, Servînaz, Hena, Mubîn, Dîana, Atusa, Hestî, Alov, Negar, Ayda, Terane, Hanîye, Aydin, Berhem.
Gelo ez do rojêke bivînî girdbîyayîş û mezunbîyayîşê înan? Ez do bibî şahîdê ameyox û resayîşê înan, ez nêzana. La ez xorînîya zerrîyê xo ra, her yew gedeyê rê weşîye, zanayîyene û cuyêka birûmete wazena. Ez înan ra hes kena; ez înan rê zanayîş û îlimdarîye wazena ke xapênayîş û hile merdiman ra dûrî vinderê, merdimî bibê û merdimîye bimojnê, azadî, cigêrayîşê edaletî, seba şarê xizmet û helwestêko bêmaben sey daranê mazêre bi kok û esîlzade.
Bi hêvîyê pêvînayîşê şima dinyayêka azad û roşnvîr de… Serkewtîya neteweyî û girdbîyayena şima waştişê min o tewr pîl o. Wa heq şima reyde bo; wa heq paştîdayox û sitarê şima bo.
Do peynîyê zilmê bêro?
Her şert û mercî de ez bêhêvî û şîyayîş û ameyîşanê zihnî rê pirr bîyayeya. Bêhêvîya vera cuyêka nezelale… Bêhêvîya seba ameyoxêko nedîyar û senînîya netîceya aye. Na rewşe do heta key dewam bikera? Do peynîya emrê nê zilmî bêro yan do wextê zilmî biqedîyo? Yan do cayê ey zalimêko bîn bêro? Do na rewşa bê neticeye reyna tekrar bikera? Hêzê dîktatorî do senîn bêro rijnayîş?
‘Ganî hêz seba xizmeta merdimîye bêro xebitnayene’
Ma ganî kesê bêtersî bi can û bîyayîşê xo bedêlê azadîye bidê, la kesê bêrûmet û tersonekî bibi wayîrî hêzî, qureyî û textê hikumdarîye û rayberîye ser ronişê? Ma netîceyê nê merdimanê pakan ê ke têkoşîn kerdê û cuya xo ra bîyê tena fotografanê xo yê zindanan xo dima verdê? Ma netîceyê hende hewldayîş û mergê embazanê mi do nê bi ke hêzê ameyoxê welatî bikewê destê kesanê ke tena menfîetê xo wazenê? Halbike ganî hêz seba xizmeta merdiman û merdimîye bêro xebitnayene. Yan do demêko nêzdî de girêkê zincîrê bindestîye reyna bêrê munitene… Sere ronayene şerm o
‘Sere ronayene şerm û qijkewtiş o’
La xemgînîya vera zaliman seba têkoşînî serewedaritiş, seba mi çimeyê bêhêvîye nîyo; ekse ci herikîyayîşê cuye û manaya cuye bi xo yo. Na dinyaya veng û bêmana ya ke mi manaya xo ci bar kerda, tena seba saxmendene û vera terse mergî ya. Sere ronayene şerm û qijkewtiş ra zêdeyê çîyêk nîyo.
