Xebatê Festîvalê Kulturî yê Dêrsimî yê Ewropa ke do emser Frankfurt de bêro viraştiş dewam kenê. Sazgehê Dêrsim û Elewîyan ê Ewropa venga şarî da ke wa bi yew tewrbîyayîşo gird wayîrê nê festîvalî bivejîyê.
Xebatê 16. Festîvalê Kulturî yê Dêrsimî yê Ewropa ke binê rayberîya Federasyonê Elewîyan ê Demokratîkan (FEDA), Federasyonê Yewîya Dêrsimî yê Demokratîk ê Ewropa (ADEF) û Kongreya Înşayî ya Dêrsimî (DÎK) de amade bîyo, bêmabên dewam keno. No festîval do tarîxê 5-6ê hezîrana 2026î de bajarê Frankfurtî de bêro viraştiş.
Sazîyê Elewîyan û Dêrsimîjanê ke cîya cîya şaristananê Ewropa de xebitîyenê û seba nê festîvalî cat kenê vengdayîşek kerd û va kesê ke wazenê kulturê xo, bawerî û komelkîbîyayena xo bipawê bêrê nê festîvalî de ca bigê û tewrê bernameyan bibê.
Dêrsimijî û nûnerê sazgehan ê ke welatanê cîyayan ê Ewropa de ciwîyenê, yew hetka ra xebatanê xo zêde kenê ke festîval bi tewrbîyayîşêko gird û pîroz vîyaro; heto bîn ra zî înan venga welatijan da ke wa xurt wayîrê nê karî bivejîyê.
Emser zî festîvalo ke seba pawitişê tarîx, kultur, ziwan, bawerî û vîrê komelkî yê Dêrsimî yeno viraştiş, do bi hezaran dêrsimijê ke ewropade ciwîyenê û dostanê înan bîyaro têhet. Çarçoveya festîvalî de yeno pawitiş ke do aktîvîteyê kulturî, panelî, qiseykerdişî, konserî û xeylê bernameyê hunerî zî ca bigîrê.
