Ame eşkerakerdene ke Festîvala Kultur û Xoza ya Munzurî ya 24. mabênê 30ê Temmuze û 2yê Tebaxe de yeno viraştene. Hetê komîteya amadekar ra ame vatene ke Festîvala Kultur û Xoza ya Munzurî ya Dêrsimî tena yew xebata kulturî nîya, heme Dêrsimijî, nas û dostê înan, roşnvîr û hunermendan, sazî û rêxistinanê demokratîkan û kesê ke zereyê xo seba xoza, aştî û azadî, edelet, teduştîye û waûbiratîya şaran dano piro, ê pêrûnan ra wayîrvejîyayişê na festîvale wazenîme.
Seba Festîvala Kultur û Xoza ya Munzurî ya ke do emser bêra viraştene, Merkezê Dêrsimî de kombîyayîşêkê çapemenî ame kerdene. Kombîyayîş Odaya Tîcaretî ya Tuncelî de bi tewrbîyayîşê zaf temsilkaranê partîyanê sîyasîyan, dezgehanê sivîlan û komeleyanê herêmî virazîya. Eşkerayîya ke hetê Komîteya Amadekar a Festîvala Kultur û Xoza ya Munzurî ya 24. ameybî hedrekerdene hetê Hemsereka Şaredarîya Dêrsimî Birsen Orhan ra ame wendene ke bi destê qeyûmî karê xo ra amebî durîfîstene.
Eşkerayîya çapemenî ya Festîvala Kultur û Xoza ya Munzurî ya 24. wina ya:
“Bi hêzo ke ma awa Munzurî ra, vîro qedim ê koyan ra û kultirê pîya yê şaranê ma ra girewto; ma pare kenî ke ma do Festîvala Kultur û Xoza ya Munzurî ya 24. rojanê 30-31ê temmuze û 1-2ê tebaxe de virazê.
Festîvala Kultur û Xoza ya Munzurî tena aktîvîteyêka kultûrî nîya
Festîvala ma; cayo pîya yê cuye û têkoşînî ya ke tede xoza, kultur, ziwan, bawerî, huner û erjê cuya azade yenê têhet. Festîvala ke 24 serrî yo vera pêro teda, qedexe û astengîyan vînderta, ewro bîya têhetameyîşanê tewr pîl ê vîrê komelî, edetê xoverdayîşî û zenginîya kulturî ya Dersimî ra yew.
Seba ney Festîvala Munzurî; tena çalakîyêk nîya, têhetameyîşêko kulturî û komelkî ya ke wayûbirayîya şaran, têduştî, azadîye û paştîdayîşî pîl kena. Festîvala ma pirdêko xurt a mabênê demê vîyarte û ameyoxî, erjêko hempar a ke vîrê ma gandar tepîşena û îfadeyêko muhîm ê gêrayîşê ma yê cuya azad a.
‘Xoza, kultur, ziwan û bawerî qet yewbînan ra nêbirîyenê’
Ewro yeno waştiş Newala Munzurî û xozaya Dêrsimî bi projeyanê madenî, awbendan, HESan û polîtîkayanê rantî bêra dorpêkerdene. Çemî, koyî, birrî û cayê cuye wazenê bêrê teslîmkerdene seba hêrsê karî yê sermaye; la ma xoza sey malê bazirganî nêvînenî, sey leteyêk vînenê ke cuye ra nêbirîyena. Pawitişê Munzurî tena pawitişê çemêk nîyo; pawitişê cuye, ameyox û vîrê komelî yo.
Eynî wextî de ziwanê ma, kulturê ma û bawerîyê ma zî binê tedayanê polîtîkayanê asîmîlasyon û yewkerdişî de yê. Labelê xoza, kultur, ziwan û bawerî qet yewbînan ra nêbirîyenê. Çinkerdişê yewî, yeno manayê qelskerdişê yê bînî. Seba ney Festîvala Munzurî, têkoşînê pawitişê xoza û têkoşînê weşkerdişê erjanê kulturî eyn bingeyî de ano têhet.
Ma do vera heme zextan vengê xo berz bikerê
Ewro Dêrsim û Pulur de rîyê tayînkerdişê qeyûmanê ke herinda îradeyê demokratîk ê şarî de ameyî tayînkerdene, mudaxaleyêkê vera heqê qiseykerdişê şarî yê serê cuye û ameyoxî yo. Labelê qet yew teserûfo îdarî nêeşkeno vîrê şarî, kultur û têkoşînê ey orte ra wedarno. Festîvala Kultur û Xoza ya Munzurî, do her tim biba çekanê tewr pîl ê wayîrvejîyayîşê erjanê şarî û weşkerdişê îradeyê hemparî ra yew.
Emser Festîvala ma de huner, muzîk, edebîyat û kulturî reyde; ma do vera talanê xozayî, netêduştî, şîdetê vera cinîyan, qetilkerdişê cinîyan, cîyakarî û vera pêro tedayanê serê cuye, vengê xo yo hempar berz bikerê. Herikîyayîşê azad ê Munzurî reyde, hesretê cuya azad ê şaran reyna reyêka bîne do bêrê têhet.
Vengdayiş: Bêrê ma wayîrê kulturê xo vejîyê
Seba ney ma veng danê heme Dersimîjan, embazanê ma, hunermendan, roşnvîran, rêxistinanê sivîlan û her kesê ke qelbê ey seba xoza, azadîye, têduştî, edalet û wayûbirayîya şaran dano piro, rojanê 30-31ê Temmuze û 1-2ê Tebaxe de wayîrê Festîvala Kultur û Xoza ya Munzurî ya 24. vejîyê.
Bêrê ma wayîrê kulturê xo vejîyê.
Bêrê ma wayîrê ziwan û bawerîyanê xo vejîyê.
Bêrê ma wayîrê xozaya xo û cayanê cuya xo vejîyê.
Bêrê ma wayîrê îradeyê şarî û erjanê xo yê hemparan vejîyê.
Bêrê ma paştîdayîş, hêvî û têkoşînî pîl bikerê.
Çunke Festîvala Kultur û Xoza ya Munzurî tena aktîvîteyêka çar rojan nîya; nameyê vîrê Dêrsimî, nameyê xoverdayîşî, zenginîya kultûrî û nameyê hêvîya ameyoxî ya azad a.
Munzur do azad biherikîyo!
Cuye, xoza û azadîye do qezenc bikerê!”
