Dewa Cafranî (Dallitepe) ya ke girêdayê Çewligîya de qetilkerdena birrî reyna dest kerd ci. Dewijî terba Muxtarê dewe seba ke birrê dewe nêbirîyo reaksîyon nîşan danê, dîlekçeyan danê heme sazîyanê dewlete la reynazî talan dewam keno.
Merkezê Çewlîgî de dewa Cafranî de birnayîşê daran o ke serra 2023 de bi destê mudur û şefê daîreya ormanî û dewijan ra Çelebî Kişin û Serkan Kîşinî amebî talankerdene nika reyna yeno talankerdene. Goreyê vatena dewijan yew mafyaya ormanî ameya viraştene û Çewlîg de çi daristanî estê yew be yew mîyanê xo de pare kenê û rantê ey wenê.
Goreyê vatena dewijan sereyê nê talanî de serqoricî Tayyîp Bolluk û Mudur û şefê daîreya ormanî ca gênê. Tayyîp Bolluk xebatkarê daîreya ormanî nîyo la her daîm odeya şefê daîreya Ormanî Cengîz Înanî ra nêvejîno. Dêwijî vanê rantê birrê Çewlîgî destê nê kesan de yo. Goreyê agahîyan eke birê dewa Cafranî qedêna, Birrê Qanyan (Ortaçanak) û Ferxanî (Îçpinar) kenê îhale û birnenê. Talan bi dewa Cafran teyna nêqedîno.
Heftê naye ra ver Muxtarê Dewa Cafranî Cengîz Kişin terba dewijan şîbi cayo ke bir yeno birnayene û eşkerayîyê dabî vat bî “Bîrnayîşê daristanî yo ke serra 2023î de bi awayêko qaçax dest pêkerdbi, nika zî dewam keno.” Kişinî dîyar kerd ke destûrê birnayîşê daran dewijan ra “Serkan Kişin û Çelebi Kişinî rê hetê Şef û Mudirîya Daristanî ya Çewligî ra ameyo dayene.”
Muxtar Cengiz Kişinî ewro zî yew dilekçeye dê mudurîya birrî ya Elezîzî. Dîlekçeya xo de bêhusulîya daîreya ormanî ser, evraqanê sexteyan ser vindeno. Bê riza û îmzaya Muxtarî ewraqî ameyê viraştene û îmzakerdene ser vindeno.
Goreyê qanûnan kesê ke dewe de serê nameyê dewe birr birnênê gerê îkametê xo serê dewe bo. Ê nê kesan yew zî serê dewa Cafran nîyo û no pê belgeyan ameyo tespîtkerdene.
