Rêxistinanê heq û huqûqî û 10 baroyan, agahdarîya hempare de ke Komîteya Wezîran a Konseya Ewropa rê kerd, waşt ke seba tatbîqkerdişê qeraranê AÎHMî yê derheqê Rayber Apo û tepişteyanê bînan prosesê kontrolî bêro tesîrdarkerdene.
Dezgehê ke rêxistinê heqan û baroyî tede yê, verê kombîyayîşê Komîteya Wezîran a Konseya Ewropa yê 9-11ê hezîrane, komîte rê agahdarîyêka hempare pêşkêş kerde. Muracat, çarçewaya prosesê kontrolî yê qerarê “Ocalan (2)” û qeraranê binpaykerdişî yê dewayanê “Kaytan”, “Gurban” û “Boltan” de ame kerdene.
Agahdarîye de ame îfadekerdene ke Tirkîya, çiqas ke qebûl kena tay mehkumê hepsê mûebbedê girankerde nêeşkenê biresê heqê veradayîşê bi şertî, hema herinda reformê şênberî sîstemê nikayî pawena. Ame qeydkerdene ke heta ewro derheqê tu verkarê qanûnî yan mekanîzmaya nîyadayîşî de gamêka şênbere nêmojnaya.
Rêxistinan veng da Komîteya Wezîran ke prosesê kontrolî hîna tesîrdar bişuxulno; Tirkîya ra dataya statîstîkî ya hîraye bêro waştene û qedexeyê kategorîkî yê veradayîşê bi şertî bêrê hewanayene. Hem zî waşt ke babeta “heqê hêvîye” hetê Komîsyonê Venedîkî ra bêro etudkerdene.
Agahdarîya hempare, hetê Komela Huqûqnasan seba Azadîye, Komela Huqûqnasanê Cagdaşe, Weqfa Cigêrayîşanê Komel û Huqûqî, Komela Heqanê Merdiman, Komelê Sîvîl mîyanê Sîstemê Înfazê Cezayî û baroyanê Êlih, Amed, Colemêrg, Mêrdîn, Mûş, Îdir, Sêrt, Riha, Şirnex û Wanî ra ameye îmzakerdene.
