Endama Rayberîya Herême ya DEM Partî Rojda Nazlier, derheqê Konferansê Rayberîya Herêmî yo Demokratîk de îfade kerd ke amancê konferansî erjnayîşê xebatanê 2 serranê peyînî û hedrekerdena xerîteya 3 serranê ameyoxî yo û vat: “Ma do bi beşdarîya şarî şaredarîyanê demokratîk û komelkî awan bikerê.”
Heyetê Rayberîya Herêmî yê DEM partî Wan, Mûş, Sêrt, Mardîn, Riha, Amed û Stenbol de konferansê Rayberîya Herêmî viraşt. Badê nê konferansan, DEM Partî do Konferanso Merkezî yê Rayberîya Herêmî mabanê 6 û 9ê hezîrane de Amed de virazeno.
Konferanso ke do 4 rojî dewam bikero, siba Salona Alî Emîrî ya Şaredarîya Amedî ya Şaristanê Girdî de dest pêkeno. 6 û 7ê hezîrane de bi sloganê “Bi îradeya cinîyan komunî awan kenê, bi rayberîya herêmî komelêko azad awan kenê” do Konferansê Cinîyan ê Rayberîya Herêmî yo Demokratîk bêro viraştiş.
Hemserekê Dem Partî, TJA, Meclîsa DEM Partî, hemşaredar û endamê meclîsanê şaredarîyan ê ke wey delege ameyê weçînayîş do beşdarê konferansî bibê.
Endama Rayberîya Herême ya DEM Partî Rojda Nazlier derheqê konferansî de ajansê ma rê qisey kerd.
‘Xebatê 2 serran do bêrê erjnayene’
Rojda Nazlier destpêkê qiseykerdişê xo de ard vîrî ke verê konferansê merkezî, 7 şaristanan de konferansê xocayî ameyê viraştiş. Aye vat nê konferansan de xebatê 2 serranê peyînî ê bi şaredarîyan rê ameyê rayîrberdiş ameyê erjnayîş û rexne û pêşnîyazî ameyê parekerdiş. Rojda Nazlier wina vat: “6 û 7ê hezîrane de ma do konferansê xo yê merkezî Amedî de virazi. Nê konferansî de ma do xebatanê 2 serranî peyînan bierjni. Badê ê zî ma do plansazî û xerîteya xo ya 3 serran hedre bikeri.”
‘Xebatê cinîyan bê maben dewam kenê’
Rojda Nazlier bale ante sîyasetê qayûmî ke nê10 serranê peyînan de Kurdîstanî de ameyê rayîrberdiş û vat ke demê qayûmî de kar û xebatê cinîyan ameyê astengkerdiş û gaspkerdiş.
Endama Heyetê Cinîyan ya Rayberîya Herême ya Merkezî ya DEM Partî Rojda Nazlier vat, badê ke şarederî reyna kewtê ma, xebatê cinîyan newe ra dest pêkerdê û wina dewam kerd: “Ma zanê xebatê ma bes nêkenê, la merheleya ke ma ewro resayê ci muhîm a. Hemverê zor û zehmetîyan ma xebatê cinîyan domnenê. Mîyanê sazgeh û merkezê cinîyan de xeylî çalaki yenê rayîrberdiş û xebatê ma bê maben dewam kenê.”
‘Îqtîdar cinîyan sey tehdît vîneno’
Rojda Nazlier qiseyê xo de dîyar kerd ke îqtîdar vera xebatanê cinîyan vindeno û vat: “Îqtîdar nêwazeno seba cinîyan xebatî bêrê kerdiş. Cinîyan sey tehdît vîneno û wazeno astengîyan vejo. La hemverê nê şert û mercan zî ma xebatanê xo domnenê.”
‘4 Rojan de plansazîya demêko newe do bêro viraştiş’
Rojda Nazlier derheqê konferansî de zî nê vatê: “Bernameya ke do 4 rojan dewam bikero, 2 rojî do tena bi beşdarîya cinîyan dewam bikero û 2 rojê peyînî zî bi hawayêko pêroyî bêro domnayene. Konferansî de xebatê ke heta nika ameyê kerdiş do bêrê erjnayene, kêmanî bêrê tespîtkerdene û plansazîya ameyoxî bêro viraştene.”
‘Ma do qerarê xo şarê xo reyde bidi’
Sewbîna Rojda Nazlier bale ante peyamo bigeyîn ê konferansî ser û wina qiseyê xo qedêna: “Peyamê ma no yo ke karê şaredarîye û rayberîya xocayî de şar beşdar beno. Ma wazenê şarê reyde qeraranê xo bidê û kar û xebatanê xo şarê xo reyde rayîr ra berê. Amancê ma xurtkerdişê şaredarîya şarî û şaredarîya komelkî yo. Ma wazenê bi beşdarîya şarî şaredarîyanê demokratîk û komelkî awa bikerê.”
