Wezaretê Karê Zereyî qeyûman sey “tayînkerdişê demkî” paweno la eksê vatişê înan, tu hemşaredarê ke ameyê girewtene nêagêrayê karê xo ser. Bêrîvan Helen Işik dîyar kerd ke proses goreyê planêko ke heta weçînayîşî ameyo dergkerdene, yeno ramitene.
Hemşaredara Sêrtî Sofya Alagaş seba xebatanê xo yê rojnamegerîye bi îdîaya “endametîya rêxistinE” heqê aye de dewa ameybî akerdene û Dadgeha Cezaya Girane ya 5. ya Amedî 28ê çele de 6 serrî û 3 aşmî ceza daye. Hemşaredarê Sêrtî Sofya Alagaş û Mehmet Kaysî, badê qerarî 29ê çele de hetê Wezaretê Karê Zereyî ra karê xo ra ameyî girewtene û cayê înan de qeyûm ame tayînkerdene. Wezaretê Karê Zereyî tayînkerdişê qeyûmî sey “wezîfedarkerdişê demkî” bi name kerd.
Her çiqas wezaret sey “wezîfedarkerdişê demkî” bi name bikero zî, hemşaredarê ke karê înan ra ameyê girewtene û cayê înan de qeyûm ameyo tayînkerdene, dewaya înan de qerarê beraetî zî amebo girewtene heta nika nêşîyê karê xo ser. Nînan ra yew Hemşaredara Sêrtî ya verêne Bêrîvan Helen Işik a ke 3 rey qeyûm cayê aye de ameyo tayînkerdene.
Serekê nikayên ê DEM Partî Tuncer Bakirhan ke o wext Hemşaredarê Sêrtî bî, 16ê teşrîna peyêne 2016 de amebi tepiştiş û cayê ey de qeyûm amebi tayînkerdene. Badê Bakirhanî, weçînayîşê 31ê adare 2019î de Bêrîvan Helen Işik û Peymandara Turhan %48.36 reyî girewtî û bîyê hemşaredarê DEM Partî. Hemşaredarî ke zêdeyê yew serrî kar kerd, 15ê gulane 2020 de seba “xebatê ke prosesê weçînayîşî de kerdê” heqê înan de tehqîqat û dewayî ameyî akerdene û karê xo ra ameyî girewtene. Cayê înan de Walîyê Sêrtî Alî Fuat Atik sey qeyûm ame tayînkerdene.
“Îqtîdar 3 demî yo ke mîyanê pratîkê sucanê xo de yo”
Bêrîvan Helen Işik ke ser ra 5 serrî vîyartê ke Wezaretê Karê Zereyî qeyyûm sey “wezîfedarkerdişê demkî” name kerdo, sey hemşaredaranê bînan ke karê xo ra ameyê girewtene ne dewaya aye qedîyaya ne zî şîya karê xo ser. Işik ke nêzdîyê 2 serrî hepsê keyeyî de menda û Dadgeha Cezaya Girane ya 2. ya Sêrtî de dewaya aye dewam kena, dîyar kerd ke qerarê dûrvistişê ke heqê aye de ameyo girewtene heta weçînayîşî ameyo dergkerdene û qerar nêameyo dayene.
Işik dîyar kerd ke qerarê dûrvistişî bi planê dergkerdişî heta weçînayîşî yenê ramitene û bi no hewa îradeya şarî kenê binê emrê yew kesî. Aye bale ant ke ewro zî eynî polîtîkayî dewam kenê û vat ke ‘îqtîdar 3 demî yo ke mîyanê pratîkê sucanê xo de yo.’ Işik da zanayene ke nêzdîyê 2 serrî hepsê keyeyî de menda û wina dewam kerd: “3 demî yo ke sîstemêkê qeyûmî dewam keno. Îzehêko huqûqî nêmendo. Nika tena şaredarî nê, seba ke enstîtuyê ke wazenê tayîn bikerê û malê şarî bigîrê qeyûm tayîn kenê. Sîstem îradeyê şarê kurdî seba menfeatanê xo qebul nêkeno.”
“Bi taybetî cayanê ke têkoşînê cinîyan berz o qeyûm tayîn kenê”
Işik qeyd kerd ke yew ra amancê tayînkerdişê qeyûman zî tahammulnêkerdişê îradeyê cinîyan o û vat: “Gama ke qeyûmî yenê kar, pratîkê înan ra ma eşkenê polîtîkaya ke dişmenî cinîyan a, bivînê. Muduranê camêrdan cinîyan ser o tayîn kenê, sazgehanê cinîyan padenê. Nê îşaretê çî yê. Amancê înan viraştişê sîstemêko nêr o. Nêzdîbîyayîşê înan ê verba hemşaredarîye dişmenkî yo û qet qebul nêkenê. Coka tim hêrîş kenê. Bi taybetî cayanê ke têkoşînê cinîyan berz o qeyûm tayîn kenê. Wazenê bi tayînkerdişê qeyyûmî biqewetîya xo bimojnê. La no nîşaneyê vindîkerdişê înan o.”
Işik îfade kerd ke qeyûman zaf zerarê dayo şaristanî û vat: “Demê Tuncer Bakirhanî de kasaya şaredarîye de pere est bî. Deynê înan çin bi. Qeyyûm ame tayînkerdene. Gama ke ma şaredarîye kerd xo dest 115 mîlyon TL deyn est bi. Ma nê deynî dayê qeyûm ame tayînkerdene. Nika zî 456 mîlyon 853 hezar 781,39 TL deyn est o. Zeraro ke dayo tena maddî nîyo. Hêrîşêko zafhetîn est o. Ziwan, kultur, nasname, tebîet û têkoşînê xoîspatkerdiş ê cinîyan rê hêrîş o. Destkewteyanê cinîyan rê hêrîş o. Xesp o, dizîye ya, kesan ra îxanet o.”
Işik peynîya qiseykerdişê xo de îlawe kerd ke Sêrt de protestoyê vera qeyûmî dewam kenê û şarê Botanî bi kaykerdiş û misyonê xo yê her qonaxê tarîxê têkoşînî de serkewte yo.
