Hemserekê DBP û DEM Partî yê şaristanê ke seba mitîngê ke do 8ê sibate de Meydanê Îstasyonî de bi sloganê ‘Azadî seba aştî’ virazîyo vengdayîş kerd û vat: “Şarê ma ganî 8ê sibate de verba zordarîyan vengê azadîye berz bikero.”
‘Ganî cinî bi tilîlîyanê xo meydan de bibê’
Hemsereka DBP’yî ya Şaristanî Sultan Yaraya ke vat şarê kurd bi serrran o mesajê aştî dano, wina dewam kerd: “Seserrî yo ke no sîstem heqê kesî nêşinasneno o semedî ra ganî êdî no sîstem bibedilîyo. Ma do seba sîstemêkê demokratîkî Meydanê Îstasyonî de bibê. Coka no mitîng muhîm o. Bi rêzdar Abdulah Ocalan di-hîrê pêvînayîş bîyê labelê nameyêk nê prosesî rê nêameyo dayene. Ma zî vanê roja mitîngî ma do pîya bêrê têhet û vengê xo berz bikerê ke nameyê nê prosesî bibo prosesê aşitî. Ma do Rojhelatê Mîyanênî de waştişê ciwîyayîşêko pîya û azad bikerê. No seserrî yo sîstem polîtîkaya vîndîkerdişê şarê kurdan tetbîq keno. Labelê înan nêşina ma. Ma wazenê ke heme şarî azad biciwîyê. Coka no mitîng zaf muhîm o. Şerêko yeno ciwîyayene de tewr zaf cinî dej ancenê û tewr zaf ê ke seba aşitî mucadele kenê reyna cinî yê. Ganî cinî mitîngî rê rayberîye bikerê. No mitîng seba cinîyan fersendêko tarîxî yo. Ganî cinî bi tilîlîyanê xo, bi govenda xo, bi kiras-fîstananê xo bêrê meydan û mesajê aşitî bidê dinya.”
‘Ganî tacrîd biqedîyo’
Hemserekê DBP’yî yê Şaristanî Mehmet Şîrîn Gurbuz dîyar kerd ke şarê kurdî seserrî yo ke seba ciwîyayîşêko bi rûmet û aştîya bi rûmet têkoşîn keno û va: “100 serrî yo şarê kurdî ser o zordarî dewam kena. Vera nê zordaran şarê ma ganî 8ê sibate de Meydanê Îstasyonî de vengê azadîye berz bikero. Yew het ra muzakereyî yenê kerdene, yew het ra bi tayînkerdişê qeyûman hêrîşê xirabê dewam kenê. Nê di çî pîya nêbenê. Ganî no diyîye biqedîyo. Ganî yewîya şarê kurdî awan biba, azadîya ey bêra temînkerdene. Tecrîd Rayberê PKK’yî Abdullah Ocalanî ser o dewam keno. Ganî muzakereyî êdî bi yewîye biqedîyê. Ganî waştişê şarî bêrê caardiş.”
‘Şerî ra feydeyê şaran çin o’
Hemserekê DEM Partî yê Şaristanî Abbas Şahîn dîyar kerd ke şerê ke Rojhelatê Mîyanênî de dewam kenê qet feydeyê xo şaran rê çin o û va: “Ma va ‘Aştîya tewr xirabine şerê tewr weşî ra weşêr a.’ Nika îmkanê pêameyîşê şertanê aştî zî est o. Ma zanê ke destêk ameyo dergkerdene û ganî no dest hewa de nêmano, seba ke şarî pîya biciwîyê destdayîş muhîm o. Ganî her kes bivîno ke bê vatişê kurdan Rojhelatê Mîyanênî de qet yew polîtîka nêeşkena biba. Seba ney ma 8ê sibate de mîtîng organîze kenê. Beşdarîya mîtîngî herêmî de zaf muhîm a. Nika prosesêk dewam keno. Seba ke nameyê nê prosesî bêro dayene û senî encamêk bido, paştîya şarî lazim a. Waştişê tewr gird ê şarî aştîya bi rûmet a. Aştîya bi rûmet zî bi muhatabanê xo bena. Seba ke ma paştî bidê na aştî ganî ma şarê xo reyde meydan de bibê û vengê aştîya bi rûmet berz bikerê.”
‘Ma Meydanê Îstasyonî de bibê’
Şahîn dîyar kerd ke no mîtîng seba cinîyan, ciwanan û şaran muhîm o û va: “10 serrî yo Kurdistan de bêkarî, qirkerdiş o kulturî, asîmîlasyon û qirkerdişê cinîyan est o. Ganî ma meseleyê kurdî û polîtîkayê şerî ra cîya nêfikirîyê. Ganî bêro vînayene ke êdî polîtîkayê şerî qet feydeyê xo komelî rê çin o. Coka wa cinîyê ma, ciwanê ma, şarê ma pîya Meydanê Îstasyonî yê Amedî de mîtîngê ‘Azadî seba aştî’ de bêrê têhet. Seba ke aştîya bi rûmet biba ganî azadîye bêra. Seba ke azadîye bêra zî ganî şertî bêrê amadekerdene. Seba ke şertî bêrê amadekerdene zî ganî ma şarê xo reyde nê cayî de bibê û vengê xo berz bikerê.”
