Profesor Mîloon Kotharî bale ante seypêyîya Rayber Apo-Gandhî ser o û vat: “Eke ma têkilîya mîyanê fikranê şarê kurd û nê her di lîderan aver berê, no hem şarê Hindîstanî de hem zî şarê kurdan de ke Gandhî nas keno, do cewabêko xurt bivîno
Profesor Mîloon Kotharî ke pisporêko xoser ê Heqanê Merdiman û Polîtîkaya Komelkî yo, ANF’yî rê derheqê çareserîya meseleya kurdan de qisey kerd. Kotharî bale ante muhîmîya “mîyankarîya hetê hîrêyinî” û seypêyîya mîyanê nêzdîbîyayîşanê felsefî yê Gandhî û Rayber Apoyî ser o.
Kotharî vat ke meseleya bingeyîne ya şarê kurdan têkoşînê heqê dîyarkerdişê qederê xo yo: “Abdullah Ocalanî tabîrê ‘konfederalîzmê demokratîkî’ şuxulna, no pênaseyêko zaf raşt o. Cigêrayîş, o yo ke entegrasyonêko temamî yo demokratîk bêro temînkerdene û qanûnê neteweyî kurdan sey şarêko xoser nas bikerê.”
Kotharî vat ke prensîbê tewr muhîmî yê tecrubeyanê kurdan ra yew, seypêyîya cinsîyetê komelkî ya, seke Rojawan de eşkera aseno; prensîbê bînî zî “wijdan” û edaletê dorûverî yê.
Kotharî bi temaskerdişê potansîyelê dîyalogê mîyanê Hindîstan û şarê kurdan, vat ke seypêyîya mîyanê fikr û xebatanê Ocalanî û Gandhî muhîm a: “Çîyo ke Gandhî cîya keno, tena fikrê ci nêbî; o goreyê nê fikran bi xo kewt hereketê mîyan. Wexto ke ti nuşteyanê Ocalanî biwanê, ti cehdê caardişê nê fikran eşkera vînenî.”
Kotharî bale ante ke Ocalan 1999î ra nat Girawa Îmraliyî de tepişte yo û qerarê AÎHMî yê “heqê hêvîye” hetê maqamanê tirkan ra nêameyî caardene: “Gamê ke TBMM’yî eştî, pozîtîf ê la proses zaf hêdî aver şino. Beşêkê nê xebatan ganî veradayîşê Ocalanî bibo, seba ke o fîzîkî beşdarê têkoşînê çar welatan bibo.”Vat ke ganî îhtîmalê “mîyankarîya hetê hîrêyinî” zî binirxno, ke Kolombîya û Îrlanda de netîce dayo.
Kotharî vat ke sîstemê heqanê merdiman ê mîyanneteweyî heta nika kedêka zêde nêdaye, çike şarê kurdan YN de sey dewlete nêyeno naskerdene: “Herinda ke ma pasîf YN’yî bipawê, ganî ma mobîlîze bibê. Welato ke nifûsê kurdan tede yo, berembarê mekanîzmayanê YN’yî de berpirsîyar ê, û ganî nê prosesanê teftîşî de mesela kurdan bêro nîşandayene.”
