Stenbol – Nuştox û Pisporê Rojhilatê Mîyanên Faîk Bulut derheqê “Konferansê Seserra Dîyine de Ravurîyayîşê Komara Demokratîk” de qisey kerd û dîyar kerd ke demokratîkbîyayîşê komare girêdayê zordayîşê komelkî yo û wina vat: “Di estunê ma yê tewr muhîmî estê, yew ziwan o yew zî statu yo. Ma şinê verê kamî, ê zî vanê ma ziwan û statu wazenê.”
13 û 14ê hezîranî de Stenbol de bi beşdarîya sîyasetmedar, roşnvîr, nuştox û xeylê kesan “Konferansê Seserra Dîyine de Ravurîyayîşê Komara Demokratîk” ame viraştene. Nuştox û Pisporê Rojhelatê Mîyanên Faîk Bulut zî tewrê konferansî bi û derheqê konferansî de Ajansê Welatî rê qisey kerd.
‘Eke planêko xorîn çin bo tesîrê ci zî çin o’
Faîk Bulut dîyar kerd ke konferansêko baldar û muhîm amê rayraberdene û ganî no tena bi salonan ra sîndorkerde nêmano û wina vat: “Mîyanê çar dêsan de manaya ci çina a. Ganî gavê bînî zî bêrê eştiş û zemînê ci yo komelkî bêro awankerdene. Eke zemînê komelkî çin bo, şar zî çîyêk fehm nêkeno û bingeyê aştîye zî nêzano. Ganî şar bêro pêhet, her şaristan de kombîyayîşî bêrê viraştiş. Ganî komeleyê herêmî bêrê awankerdene û nê komeleyî şorê herêman. Lazim o ke xebatêka xorîne û bi planî bêra amadekerdene. Eke planêko xorîn çin bo tesîrê ci zî nêbeno. Ganî komîsyonî û partîyê sîyasî bêrê îknakerdene. Ganî dîplomasî zî bibo, sîyaset bê dîplomasî nêbeno. No konferans sîyaset o la ne sîyaseto rast û rast o. Sîyasetê wextêkî yo, estunan awan keno. Eke nê estunî saxlem nêbê, komara demokratîk nêyeno ronayene.”
‘Şar xeylê çîyan perseno la cewab çin o’
Faîk Bulutî ard vîrî ke verê zî xeylê konferansî amê viraştiş û wina qisey kerd: “Tîya ra tepîya ganî ma dersan tira bigîrê. Ma bêrê tîya qisey bikerê û şorê keyeyê xo, wina nêbeno. Sey misalî vana, ganî kesê ke tîya qisey kenê sey derwêşêkî şorê şaristanan û şarî îkna bikerê. Wa bigêrê û şarî ra vajê ke no semedê menfîetê aştîye yo. Şar xeylê çîyan perseno, bêcewab manenê, ganî cewabî bêrê dayene. Komun çî yo, senî beno demokratîk? Ganî ma nê persan ser de vindirê.”
‘Şarê Kurdî zî hema îkna nêbîyo’
Faîk Bulutî dîyar kerd ke demokratîkbîyayîşê komare girêdayê zordayîşê komelkî yo û wina dewam kerd: “Eke ti zor nêdê serê rayedaran nêbeno, xo ra ê zî nêwazenê. Ganî ê zî bêrê îknakerdene. No semedê menfîetanê şarê kurdî û tirkan o. Vanê wa qanûnê bingeyînî bêro vurîyayene. Ê qanûnî goreyê ke bêrê vurîyayene, no muhîm o. Ganî hepisxane ra girewteyî bêrê veradayene, qeyûmî bêrê peyserantene. Nê gamî do fekê her kesî bigîrê. Şarê Kurdî zî hema îkna nêbîyo. Semedê ke her kes îkna bibo nê gamî sere de lazim ê.”
‘Şar ziwan û statu wazeno’
Faîk Bulutî viraştişê qanûnan ser o zî nê çîyî vatî: “Ganî ma nameyê qanûnan ser nêvinderê. Çîyo tewr muhîm muhtewa ya. Rayberîya herêmî yeno manaya xoserîye, sey misalî no bes o. Qanûnê ke babetê şaristanan de yê bêrê vurîyayene, xora şar xo bi xo îdare keno. Homayî zî îrade dayo însanan, nê îradeyî de şinasnayîşê heqan esto. Qanûnê ke bêrê viraştişî, nameyê înan muhîm nîyo. çîyo tewr muhîm muhtewaya, muhtewa çîyo ? Yew ziwan o yew zî statu yo. Her kes bi ziwanê xo ameyo dinya. Ayetan de zî yeno vatene ke her ziwan ayetê mi no. Ziwan heqo tewr muhîm o. Şert çin o, dewlete yan zî otonomî şertê xo bi xo îdarekerdişî yo. Ewro rayberîya organîke est a. Rayberîya organîke de tu kes bi zerrîya xo nêeşkeno serekkomarî bivîno. La serekê şaredarîyan vejîyenê mîyanê şarî, her kes eşkeno şoro kîşta înan. Di estunê ma yê tewr muhîmî est ê, yew ziwan o yew zî statu yo. Eke ê çin bê ma nêeşkenê keyeyê xo awan bikerê. Ma şinê verê kamî ê vanê ma ziwan û statu wazenê.”
