Ame zanayene ke Tom Barrack Bexdad de yo û do serekanê payeberz ê Îraq û Başûrî reyde rêze kombîyayîşan bikero. Sewbîna yeno vatene ke Tom Barrack do Hewlêr de Fermandarê Pêroyî yê HSD’yî Mazlum Ebdî û rayberanê ENKS’yî reyde zî bêro têhet.
Temsîlkarê Taybet ê Serekê Amerîka yo ke seba kar û baranê Sûrîye û Îraqî Tom Barrack, paytextê Îraqî Bexdad de yo. Yeno zanayene ke Tom Barrack do rayberanê payeberz ê Îraq û Başûrê Kurdîstanî reyde rêze kombîyayîşan organîze bikero.
Tom Barrackî resayîşê xo ra pey medyaya dîjîtal ser o dîyar kerd ke seba pêşkêşkerdişê paştîdayîşê Serekê Amerîka Donald Trumpî yê seba hukmatê Îraqî, do Serekwezîrê Îraqî Elî Zeydî reyde bêro têhet.
Sewbîna Tom Barrackî dîyar kerd ke seba xêzkerdişê xerîtayêka newa, seba hemkarîyêka xurt û domdar a mabênê her di hetan do Elî Zeydî reyde hemkarîya stratejîke ya mabênê Îraq û Amerîka ser o qisey bikerê.
Gorê zanayîşan, Tom Barrack do dimayê kombîyayîşanê xo yê Bexdad, şêro zîyaretê Başûrê Kurdîstanî û uca de rayberanê herême û serekanê beşêkê hetanê partîyanê sîyasîyan ê herême reyde bêro têhet.
Yeno vatene ke Tom Barrack do Hewlêr de Fermandarê Pêroyî yê Hêzanê Sûrîyeya Demokratîk (HSD) Mazlum Ebdî û rayberanê ENKS’yî reyde zî kombîyayîşêk bikero.
Erjeno merdim vajo ke şewa bîne Radyoya Monte Carlo eşkera kerd ke Tom Barrack Bexdad de yo û hişyarîyêka huşke daye grûbanê çekdaran. Ey hişyarî daya ke qet yew serekê grûbanê çekdaran zî heta aşma êlule çekanê xo teslîm nêkero, do vejîyê mehkemaya Îraqî û bi sucdarîya ‘serewedaritişî’ bêrê muhakemekerdene.
