Heyetê Îmralîyî yê DEM Partî derheqê pêvînayîşê Serekê Meclîsî Numan Kurtulmuşî de eşkerayîyêka nuştekî pare kerd Heyete aşkere kerd ke înan çarçewaya qanûnî ser o pêvînayîş kerdo.
Heyetê Îmralîyî yê DEM Partî yo ke tede Parlamentera Wanî Pervîn Buldan û parlamenterê Rihayî Mîthat Sancar ca gênê, meclîs de Serekê Meclîsî Numan Kurtulmuşî reyde kombîyayîşêk vîraşt. Dimayê kombîyayîşî heyetî eşkerayîyêka nuştekî seba raya pêroyî vila kerd.
Eşkerayîya nuştekî yê heyetî wina yo: “Ma Serekê Meclîsî Birêz Numan Kurtulmuşî reyde kombîyayîşêk vîraşt ke no kombîyayîş 40 deqîqeyan dewam kerd. Rojevê kombîyayîşê ma çarçewaya qanûnî bibi. Ma nê kombîyayîşî de fikrê xo yê çarçewaya qanûnî pare kerdî ke ganî binê banê meclîsî de bêra vîraştene. Birêz Numan Kurtulmuşî zî dîyar kerd ke ê zî eynî fikrî de yê û do xebatê înan ê serê na babete dewam bikerê. Vatişê çarçewaya qanûnî, eştişê gamanê şênberan û serê na babete de fikrê hempare û xurtkerdişê roê TBMM’yî yê nê warî de zaf muhîm bîyê.”
