CPT Îraqî Kurdistanî eşkera kerd ke Tirkîya dewanê herêmanê Sindî û Gulî yê Zaxoyî ra kontrolê 21 dewan girewto xo dest û nêverdana dewijî ageyrê dewanê xo.
Tîmê Aştîviraştoxan (Community Peacemaker Team-CPT Îraqî Kurdistan), hesabê xo yê platformê Xî de pare kerd ke Tirkîya Herêma Kurdistana Federe de, herêma Zaxoyî de kontrolê 21 dewan girewto xo dest, û herême de baregehê leşkerî nayê ro û nêverdana şarê dewan nê cayan ra derbaz bo.
Eşkerayîya CPT’yî de nê vatîşî ca gênê: “15ê Hezîranî de ameyo zanayene ke leşkeranê Tirkîya herêmanê Sindî û Gulî yê Zaxoyî de, ageyrayîşê dewijan ê seba keyeyanê înan asteng kerdê. Dewijî danê zanayene ke dewanê înan êdî binê kontrolê artêşa Tirkîya de yê. Dewijan da zanayene ke wezîfedarê leşkerî yê Tirkîya na devere de baregehê leşkerî nayê ro û keyeyê ke veng ameyê verdayene zî îşgal kerdê.”
CPT’yî 9ê Hezîranî de zî dabi zanayene ke leşkeranê Tirkîya reyna Herêma Kurdistana Federe de, qezaya Amêdîyî ra dewa Sîda ya Şêladizê de verê Muhafizanê Sînorî yê Îraqî birnabi û kontrolê kîmlîkanê înan kerd bi û dima qeydkerdişê kîmlîkan ra destûr dabi ke derbaz bibê. CPT’yî aşkera kerd ke no caardiş aşma Nîsane ra nata dewam keno.
