Êlih – Endamê Baroyê Êlihî avûkat Mehmet Şîrîn Arslan derheqê prosesê “Aştî û Komelê Demokratîkî” yo ke hetê Rayberê Şarê Kurdî Abdullah Ocalanî ra amebi destpêkerdene, dîyar kerd ke vatiş û kerdişê dewlete yewbînan ra cîya yê û vat: “Rêzdar Ocalan aştî de samîmî yo.”
Prosesê “Aştî û Komelê Demokratîkî” yo ke Rayberê Şarê Kurdî Abdullah Ocalan dabi destpêkerdene, munaqeşayê hedrekerdişê qanûnanê azadîye û eştişê gamanê laziman ser o dewam kenê. Sewbîna, Abdullah Ocalan seba caardişê şert û mercanê aştî û sîyaseto demokratîk xeylî gamî eştê û bi ewnîyayîş û pêşnîyazanê xo çareserîya sîyasî ver rayîr akerdo.
Endamê Baroyê Êlihî avûkat Mehmet Şîrîn Arslanî derheqê prosesê Aştî û Komelê Demokratîkî de qisey kerd.
‘Rêzdar Ocalan xeylî samîmî yo’
Mehmet Şîrîn Arslanî îfade kerd ke seba ke aştî herême de domdar biba Rayberê Şarê Kurdî Abdullah Ocalan û Têgêrayîşê Azadîye destê înan ra çi yeno kenê û vat: Rêzdar Ocalan, na mesela de xeylî samîmî yo. Seserra ra zêde yo ke problemê kurdan est o. Dewletê tirkan hetanî ziwanê Kurdkî û şarê kurdî qebul nêkero, do game zî nêerzo. Demo ke gamî nêrê eştiş, do no problemî zî zelal nêbî. Eke seba wedarişitê tecrîd û prosesî gamî bêrê eştiş, do şar zî êdî nê prosesî ra bawer bikero. Babeta ‘heqê hêvî’ ya ke Serekê MHP’yî Devlet Bahçelî zî qal kerdbi, tena bi vatişan de maneno. Wexto ke nê vatişî nêrê caardene, do êdî mîyanê komelî de zî bêbawerîye gird biba.”
Mehmet Şîrîn Arslanî ard vîr ke nêzdîyê 2 serrî yo ke proses ameyo destpêkerdene û vat: “Heto bînî ra ê ke rayraberdişê prosesî ra eleqedar ê hema zî gamêka şênbere nêeşta. PKK’yî çekî veşnayî, xo fesix kerd, vengdayîş kerd û tewr peyên zî hêzê xo tîya ra antê. Rixmê eştişê nê gaman vengêk dewlete ra nêvejîya.”
‘Şarî kurdî aştî wazeno’
Mehmet Şîrîn Arslanî dîyar kerd ke seba wedaritişê tecrîdê Rayberê Şarê Kurdî Abdullah Ocalan û averberdişê prosesî hema zî gamê lazimî nêameyê eştiş û dewam kerd: “Xora dewlete vana ma heta nika wina derbas kerdo û ma do tira pey zî reyna kurdan wina bixapênê. Ferasetê dewlete de çîyêko seba başîya kurdan bibo, ey nêkena. Nê çî xeylî reyî ameyê serê kurdan. Seba ke serra 93î ra heta nika xeylî reyî prosesî ameyê destpêkerdene û nêameyê çareserkerdene. Seba nê nêzdîbîyayîşan êdî bawerîya şarê kurdî zî prosesî rê nemenda. Kurdî wazenê na herre ser o mîyanê azadî, aştî û sey wayûbira biciwîyê.”
‘Ganî şarê kurdî şîyar bo û nêro xapênayîş’
Mehmet Şîrîn Aslanî bale ante qerarê Mehkemaya Heqanê Merdiman a Ewropa (MHME) ser o û derheqê ‘heqê hêvî’ de vat ke no heq tena seba Abdullah Ocalanî nîyo, seba heme girewteyan o, la no qerar Tirkîya de nêno caardene. Ey wina vat: “Şarî kurdî xeylî reyî ameyo xapênayîş coka na rey ganî nê prosesî de şîyar bo û nêro xapênayîş.”
‘Bawerîye bi caardişê waştişan virazîyena’
Mehmet Şîrîn Arslanî dîyar kerd ke derheqê ‘heqê hêvî’ de hema zî tu gamî nêameyê eştiş û qiseykerdişê xo wina qedêna: “Çîyê ke dewlete vana tena vatişan de manenê. Amancê ereyeştişaanê gaman, prosesî seba xo asankerdişo. La ma bawer nîyê ke ê reyêka bîne bibê îqtîdar zî. Çend aşman ra ver raporêk raya pêroyî rê peşkeş kerd, la kêmîyê ê raporî xeylî bîyê. No proses ne girêdayeyê komîsyonan o ne zî rîpelanê raporan o, bi seyan rîpelê bibê zî reyna tu çîyêk nêano ziwan.”
‘Proses çareser bibo zî do têkoşîn dewam bikero’
Mehmet Şîrîn Arslanî îfade kerd ke gamê ke yenê eştiş seba çareserîye kêm manenê û vat: “Komîsyono ke ameyo awankerdene, ganî rîpelan ser o nêmano. Komîsyon meclîsî de nê ganî mîyanê şarî de bixebitîyo ke bizano şar çi wazeno, no problem senî bêro zelalkerdene û çareserkerdene. Naye ra ganî vengê şarê kurdî bieşnawê ke bawerîya şarî nê prosesî rê biba.”
