Serekwezîrê Îngîlîstanî Keîr Starmerî, 2 serrî girewtişê wezîfeyê xo ra pey, lîderîya Partîya Karker (Labour) ra îstîfa kerd.
Serekwezîrê Îngîlîstanî Keîr Starmerî, lîderîya Partîya Karker (Labour) ra îstîfa kerd. Keîr Starmerî eşkera kerd ke ey Charlesê 3. reyde zî kombîyayîşêk viraşto û qerarê xo ey reyde pare kerdo. Keîr Starmerî rayberîya partî ra waşt ke teqîwîmê weçînayîşê lîderê neweyî dîyar bîkerî û eşkera kerd ke muracatê namzedîye do 9ê temmuze de dest pêbîkerî. No proses, verê ke parlamento bikewo betlaneyê hamnanî do temam bibo. Bi nê hewayî yeno pawitene ke lîdero newe do aşma êlule de, akerdişê parlamentoyî ra ver dest bi wezîfeyê xo bikero.
Sozê paştdayîşî seba lîderê neweyî
Keîr Starmerî eşkera kerd ke seba ke prosesê wezîfe ra aqitîyayîş bi hawayêko aram û biserûber vîyaro do xebata xo bidomno. Sewbîna dîyar kerd ke o do paştîdayîşêko tam bido serekwezîrê ke do ey ra pey bêro wezîfe ser o.
Keîr Starmerî vat ke Îngîlîstan goreyê 2 serrî verê cû welatêko hîna xurt û adil o û seba na xebate zî sipasîya embazanê xo yê karî, personelanê hukmatî û wezîfedaranê pêroyî kerd.
Binkewtişê weçînayîşê herêmî lez da prosesî
Tedayê serê Keîr Starmerî, dimayê vindîkerdişê pîl ê Partîya Karker ê weçînayîşanê herêmî yê aşma gulane de zaf zêde bibi. Mîyanê nê weçînayîşan de partîya rastgir a huşk Reform UK ya binê lîderîya Nîgel Farageyî serkewtişêko zaf pîl bidest vistbi.
Mîyanê partî de zî tewr kêm 72 parlamenteran Keîr Starmerî ra waştbi ke wezîfeyê xo ra îstîfa bikero yan zî teqwîmêko dîyar bikero. Ame vatene ke tayê wezîran zî îstîfa kerd û tedaya serê lîderî hîna zêde bîya.
Andy Burnham sey favorîyo tewr xurt yeno mojnayene
Dimayê îstîfaya Keîr Starmerî, yeno vatene ke namzeto tewr xurt ê seba lîderîya partî û Serekwezîrtîye Andy Burnham o.
Andy Burnham ke serra 2017î ra nat wezîfeyê Serekîya Şaredarîya Manchesterî ya Şarsitanê Girdî kerdêne, weçînayîşanê çend roj verê cû de herêma Makerfieldî de sey parlamenter amebi weçînayene. Andy Burnham ke mîyanê welatî de sey “Qralê Vakûrî” yeno pênasekerdene, xebata weçînayîşî de vatbi ke wazeno partîya karker û welatî bibedilno.
Andy Burnham nika sîyasetmedaro tewr populer o û verê cû serranê 2010 û 2015î de zî seba lîderîya partî xebitîyabi.
