Venezuela de bi girdîya 7,5 u 7,2 di erdlerzê ameyê meydan. Erdlerzî mabênê 39 sanîyeyan de têdima virazîyayê. Hûmara merdeyan nêyeno zanayiş û xesarê zaf girdî biyê.
Merkezê Cigêrayîşê Jeolojikî yê Amerîka (USGS) derheqê erdlerzê Venezuela de eşkerayîyê da. USGS’yî pare kerd ke Venezuela de di erdlerzî têdima amey meydan. Mabênê her di erdlerzan de tena 39 saniyeyî est ê. USGS’yî tewr vernî de girdîya erdlerzî sey 7,1 eşkera kerd la dima na agahî newe kerde. Goreyê zanayîşan, erdlerzo yewin bi girdîya 7,5 başûrê rojhelatê şaristanê Yumareyî de ke girêdayê eyaletê Yaracuyî de virazîya. Erdlerzo dîyin zî bi girdîya 7,2 vakurê rojhelatê şaristanê San Felipeyî de ke o zî eynî eyaletî de yo, qewimîya.
Ame zanayiş ke xorîya erdlerzê Yumareyî 10 kîlometre û yê San Felipeyî zî 21,9 kîlometre binê erdî de bîyo. Hûmara merdeyan zelal nîyo, badê erdlerzî hişyarîya tsunamî ame dayene. USGS’yî pare kerd ke hûmara merdeyan beno ke mabênê 10 hezar û 100 hezarî de bi bedelîyo û vat: “Mumkun o ke merdeyî zafê û xesaro zaf û felaketêko gird virazîyayo.”
Înternet birîyayo
Medyaya Venezuela zî pare kerd ke zaf tîmê cigêrayîş û xelaskerdişî şîyê cayê ke avahîyê tede rijîyayê. Xeberan de ame vatiş ke tayê şaristanan de binawanîya înternetî birîyaya. Coka ra derheqê ziyanê ganî û madî de zanayîşê zelalî çi nîyê. Wezîrê Karanê Zereyî yê Venezuela Diosdado Cabello derheqê felaketî de eşkerayîyê dayê, Cabelloyî da zanayiş ke serebûtêko sîsmîk ameyo meydan û her çî nîşan dano ke şidetê girdîya erdlerzî 7 ra zaf zêde yo. Cabelloyî pare kerd ke erdlerz şaristano Trujillo, Yumare, Yaracuy, Carabobo, Aragua, Miranda, Karakas û La Guaira de bi şiklêko çetin ameyo hîskerdiş.
Cabelloyî dîyar kerd ke paytext Karakas de tayê avahîyê rijîyayê. No zî esto ke banê Teyaragehê Mîyanneteweyî yê Maiquetiayî zî rijîyayo û heme firînî betal bîyê. Cabelloyî semedê rîskê erdlerzan welatijî hişyar kerdî û waşt ke welatijî mekuyê keyanê xo û teber de bimanê.
