Girewteyo nêweş Mehmet Elçe, rixmê raporê ATK’yî ke vano “Nêeşkeno hepisxane de bimano” zî nêyeno veradayene. Lajê Mehmet Elçe, Huseyîn Elçeyî bal ant rewşa peyêne ya pîyê xo û vat: “Nêweşîyê ey her ke şonî zêde benê. Êdî nêeşkeno rayra şêro û tena bi hetkarîya kursîya biteker eşkeno bigêro. Ganî bilez bêro berdayene.”
26ê tebaxa 2016î de qezaya Cizîrî ya Şirnexî de, Mudirîya Polîsan de teqînêk qewimîyabi. Goreyê agahîyanê Walîtîya Şirnexî, nê teqîyayîşî de 12 polîsan cuya xo vîndî kerdbî û 78 kesî zî birîndar bibî. Panc rojî dimayê na hedîse, Mehmet Elçe û 4 embazê ey demo ke Silopîya ra gureyê xo ra agêrayêne, ameyî destbendkerdene û dima ra ameyê girewtene.
Mehmet Elçeyî rê çarçewaya na dewa de 12 reyî cezaya muebedo girankerde û 2 hezar û 500 serrî cezaya hepsî ameye daayene. Mehmet Elçeyo ke nika 64 serrî yo, dima ke ame girewtene, nêwweşîya kanserê madeyî girewt. Serra 2022î de Dîlok de hetê Nêweşxaneyê Perwerde û Cigêrayîşî yê Dr. Ersin Aslanî ra raporê “Nêeşkeno hepisxane de bimano” seba ey ame dayene. Mehmet Elçe nika Hepisxaneyê Tîpa R’yî yê Xarpêtî de yeno girewtene. ATKyî raporê xo yê derheqê Mehmet Elçeyî de vat: “Tena bi sereyê xo nêeşkeno lazimtîyanê xo bîyaro ca û nêeşkeno hepisxane de bimano.” Goreyê nê qerarî ganî Mehmet Elçe biameyêne veradayen la Dozgerîya qerarî red kerd. Ney ser o Mehmet Elçe seba bicaardişê raporê ATK’yî, muracatê Mehkemaya Înfazî ya Hepisxaneyî kerd.
Lajê ey Huseyîn Elçeyî derheqê rewşa peyêne ya pîyê xo ser o ajansê ma rê qisey kerd.
‘Ma êdî nêzanî seba kamcîn nêweşîye dermanan peyda bikerî’
Huseyîn Elçeyî dîyar kerd ke rewşa weşîye ya pîyê wî zaf giran a û vat: “Serra 2016î de, demo ke gureyê xo ra agêrayêne, ame girewtene. Nêzdîyê 10 serrî yo ke hepisxane de yo. Nika rewşa ey a weşîye zaf xirab a û çend nêweşîyê giranî tede est ê. Ewro seba ke nêweşîyê ey zaf zêde yê, ma nêzanî kamcîn nêweşîye rê dermanan peyda bikerî yan zî tedawîya ey bidê destpêkerdene. Des rojan ra ver raporê ey ame la dozgerî waştişê veradayîşî red kerd. Rixmo ke ATK’yî rapor de vato, ‘No kes nêeşkeno binê şertanê hepisxaneyî de cuya xo bidomno’, dozgerî waştişî red kerd û tu cewabo weş nêda.”
‘Tenê seba gumanan ameyî girewtene’
Huseyîn Elçeyî vat ke pîyê ey bêsuc bi serran o hepisxane de yo û wina dewam kerd: “Bi tu hawayî sucê pîyê mi çin o. Uca de venganîyêka huqûqî yan zî îdarî est bî û rîyê na venganîye ra tay kesî kerdî qurban û ey uca de girewt. Na dewa de panc kes ameyî girewtene; pîyê mi, datê mi û hîrê embazê înan ê bînî. Her çar kesê bînî zî wayîrê keyeyî, wayîrê domanan û karker bîyî. Ma nêeşkenî seba înan vajê ke çîyêk kerdo. Tenê seba gumanan yan zî sucdarîyêka bêbingeh ameyî gîrewtene. Nika domanê înan teber de perîşan bîyî.”
‘Tenê bi hetkarîya kursîya biteker eşkeno rayara şêro’
Huseyîn Elçeyî vat ke goreyê raporê peyên ganî pîyê ey bilez bêro veradayene û wina domna: “Eşkera bi ke rîyê nêweşîyan ra o nêeşkeno hepisxane de bimano. Serra 2021î de kanserê madeyî ra madê ey bi emelîyat ame girewtene. Tedawîya kemoterapîye dîye. Sey şeker û tansîyonê berz nêweşîyê ey ê kronîkî est ê. Damarêkê serê ey xetimîyayo û kîşta ey a çepe felç bîya; nê semedî ra nêeşkeno lazimtîyanê xo yê rojaneyan bîyaro ca. Teşhîsê KOAH’î ame dayene. Nêweşîyê ey her ke şonî zêde benê. Nika êdî nêeşkeno rayra şêro û tena bi hetkarîya kursîya biteker rayra şono. O zî tena bi hetkarîya embazanê xo yê hepisxaneyî eşkeno cuya xo bidomno.”
“O nêeşkeno hepisxane de bimano’
Peynîya qiseykerdişê xo de Huseyîn Elçeyî veng da rayedaran û vat: “Emrê pîyê mi pîl o. Êdî nêeşkeno hepisxane de biciwîyo. Hepisxane de, merdim weş bibo zî uca de ciwîyayîş zaf çetin o. Ser de zî bi desan nêweşîyê ey ê giranî est ê. Waştişê ma tena o yo ke bêyî ereykewtiş bêro veradayene ke emrê xo yê mende mîyanê gedeyanê xo de û binê şertanê weşan de bivîyarno.”
