Hemsereka Pêroyî ya DBP’î Çîgdem Kiliçgun Uçar beşdara kombîyayişê şarî ya Çolîgî de bî û Uçar wina va: “Zu dar bêro fikrê ma, dar eke awe û tij nêdî; beno wusk. Dewlet û îqtîdar wast ke sarê kurdan sey darî wusk bo. Nê pêrodayişê ma, ma rê bî awe, xoverdayişê ma, ma rê bî tîjî.”
Partîya Herêmanê Demokratîke (DBP) û DEM Partîye seba mesajê Rayberê PKK’î Abdullah Ocalan bi şarî rê nîqaş bikerê; “Çalakîyê aştîya komelî û azadîye” dabî destpêkerdêne. Çarçiweya bernameyî de ewro Çolîg de bi şarî rê kombîyayiş ame viraştêne û Kombîyayiş de Hemserekê Pêroyî ya DBP’î Çîgdem Kiliçgun Uçar qise kerd.
Ma vanê pîya qisebikime
Hemsereka DBP’î Çîgdem Kiliçgun Uçar: “Şarê ma yê delal şima bi xêr ameyê, sernameyê Partîya Herêmanê Demokratîke, pêroyînî rê silam û hûrmetê xo vana. Ju demo neweyî yeno qisekerdêne, nî demê neweyî de ameyoxê sarê kurdan, cinî û xortê ma, çi tewir beno ma vatê ke pêro pîya qise bikerime. Partîya DEM û DBP’yî nêzdîyê 15 bajaran de serwa haştî, azadî û serpirodayişa sarê kurdan, ma çi fikirderîme. Dewlete hetanî nika se kerd? Na dema neweyî de barê ma çiko, ma vanê pîya qisebikime.”
Çîgdem Kiliçgun Uçar aşkera kerd ke ju seserre ver ra, na dewlete na seserre de îqtîdarî pêroyin raver vat ke ‘kam ke na welat de weşîya xo ramenê vatê ke pêroyê înan tirk ê.’ Û wina domna: “Peyra vatêne ke ‘tirk û kurdî wayî û birajê yewbînan ê, pey ra zî vatê persa kurdan çînîyo.’ Hetta dewlete hîn bî, se kerd? Nika ma pêro-pîya vînenîme, rejîmê qeyûmî, tecrîd, şero taybet her çi weşîya ma de ma dî. Pers kenîme naye ra pey, ma azadîya xo, haştîya nî welatî bi destê xo, sarê pêroyino nêeşkînîme virazime. Şikinîme? A dem, na dem a. Zanime, her kesî de qise kenime, kes nêvano ke hetanî nika na persa kurdan rê sebikime. Ma teyna çareser nêvînenîme, nêbeno. Ek ju ca de pers est o, gereke pîya qise bikerîme. Na teyna karê îqtîdarî nîyo, hunde partî estîme ke zanime ke persa kurdan tena partîyeke nîya, tena karê dewlete, komê ma û sare pêroyin o. Ge ge vanîme ke na dewlete yanî îqtîdar, yanî sîyasî partîyê bînî sankî na welate de persê giran çîn o, hin qise kenê û pratîk virazenê.”
Na welate cinnet bî
Çîgdem Kiliçgun Uçar dîyar kerd ke nê eke sima persa kurdan nêdî, ê nêeşkînîme nê welatî demokratîk bikîme, ê nêeşkînîme pêro pîya qise bikîme û wina qedîna: “Kamîya ma, nasnameyê ma hetanî nika kam rê xirabiyîn ard? Zonê ma hetanî nika kamî rê xirabiyin ard. Ma rê vanê ke şima partîyê Tirkîya nîyê, nê ma vanîmî ke dewlemendîya na dewlete zafê ma nas kenê. Ma zanenê ke na welat zaf dewlemend a, zon zaf o, kamî û nasname zaf o. Sima pêro qir kerd, na welate cinnet bî, sima kerd çol. Zu dar bêro fikrê ma, dar eke awe û tij nêdî; beno wusk. Dewlet û îqtîdar wast ke sarê kurdan sey darî wusk bo. Nê pêrodayişê ma, ma rê bî awe, xoverdayişê ma, ma rê bî tîjî. Ma xobixo bawerîme, ewro pîya persa xo, haştî û heqîqatê xo qise kenîme. Raya haştî çi tewir beno qise kenîme û na rayîr de barê çi keno me pêro pîya qise kenîme. Kesî ra nêtersenîme, kesî ra mînet nêkenîme û hetanî nika sarê kurdan Serdarê Kurdan Birêz Ocalan se vat, hetê îderî me.”
