DEM Partî derheqê Kongreya Pîle ya Asayî ya 5. de ke do 20ê êlule de bivîraza agahîname weşana û eşkera kerd ke ê bi îradeyê vûrayîş û bedilîyayîşî seba dewrê neweyî do xerîtaya rayîrî bivirazî.
Amadekarîyê Kongreya Pîle ya Asayî ya 5. ya Partîya Têduştî û Demokrasî ya Şaran (DEM Partî) ke do 20ê êlule de bêra viraştene, dewam kenî. Dima ke roja kongre dîyar bîye, ame vatene ke xebatê seba serdemê neweyî ameyî destpêkerdene. Goreyê zanayîşanê ke hetê rayberanê partî ra ameyî parekerdene, serdemê neweyî de ke tede “Çarçewaya Qanûnî” yenê munaqeşakerdene, DEM Partî do bi hawayêko xurt nê serdemî pêşwazî bikero.
Derheqê babete de agahînameyî de ke DEM Partî amade kerdo û heyetanê xo reyde pare kerdo, ame dîyarkerdene ke mekanîzmayê rêxistine do bêrê xurtkerdene. Çarçewaya “Komara Demokratîke û Rayîrê Hîrêyîn” de, na kongre do sey kongreya vûrîyayîş û bedilîyayîşî bêra erjnayene û goreyê nê çî xebatî bêrê kerdene.
Agahîname de ame dîyarkerdiş ke qerarê amadekarîyanê kongre kombîyayîşê komxebate yê Kongreya Demokratîke ya Şaran (HDK) û DEM Partî de ke 15-16ê Hhezîrane de Stenbol de amebî viraştene, ameyo girewtene. Goreyê agahîname, DEM Partî do bi sloganê “Seba Komara Demokratîke Komelo Azade û Rêxistinkerde” û “Bi Têkoşînê Azadîya Cinîyan Ver Bi Komela Demokratîke” Konferansê Pîl ê Cinîyan mabênê tarîxanê 20-21ê tebaxe de biviraza, mabênê tarîxanê 22-23yê tebaxe de zî do Kongreya Pîle ya Merkezî bêra viraştiş. Sewbîna DEM Partî do mabênê tarîxanê 20-30yê temuze de 7 herêman de konferansanê herêmîyan bivirazo.
DEM Partî dimayê nê xebatan do Kongreya Pîle ya Asayî ya 5. bivirazo û bi îradeyê vûrîyayîş û bedilîyayîşî seba serdemê neweyî xerîteya rayîrî amade bikero.
