Komeleya Rojnamegerê Cinî ya Mezopotamyayî (MKG) û Komeleya Rojmegeran a Dîcle û Firatî (DFG) derheqê kiştişê rojnameger Azîz Koyluoglu de beyanat dayê û kiştişê Rojnameger Azîz Koyluogluyî şermezar kerdê û vatê verba nê hêrişan wa çew bêveng nêmano.
Komeleya Rojnamegerê Cinî ya Mezopotamyayî (MKG) û Komeleya Rojmegeran a Dîcle û Firatî (DFG) verba hêrişê ser çapemenîye û kiştişê rojnameger Azîz Koyluogluyî de beyanato hembar dayê.
MKG û DFGî beyanat de dîyar kerdê ke kedkarê çapemenîya azade Kurdistan, Tirkîya û Rojhîlatê Mîyanênî û çar hetê dinya de hewl danê ke heqîqetî bi raya pêroyî rê pare bikerê û wina vatê: “Şertê tewro zor de û bi heme rîskan kewtê pey şopa heqîqetî û hewl danê ke heqîqetî roşn bikê. Rayîre heqîqetî de zaf embazê ma şehîd bîyê. Ameyê destbendkerdêne û hepskerdêne. Heme hêriş, zext û tundîya îqtîdarî ya verba kedkarê çapemenîye de zî kedkarê çapemenîye dest gêrayişê xo veranêdanê. Kedkarê çapemenîya azad gam tepa nêeştê û gêrayişê xo yê heqîqetî dewam kenê.”
Şermezar kerdê
MKG û DFGî kiştişê Rojnameger Azîz Koyluogluyî şermezar kerdê û wina domnayê: “Kedkarê bîn ê çapemenîya azad hêrişê hewayî de ame kiştiş. Tirkîya 27ê Çeleyî de Qezaya Ranya ya Silmanyeyî de rojnameger Azîz Koyluoglu kişt. Ma rayêka bîn soz danê ke ma do qalem, kamere û wênekeşê embazê xo yê ameyê kiştiş û hepskerdiş erd de nêveradê. Çapemenîya Azade hetanî nika verba ti hêriş, kiştiş, hepskerdiş û destbendkeriş de bêveng nêmend, do nika ra pey zî bêveng nêmano.”
