Rojnamegere Stêrk Gulo pare kerd ke cuya rojnameger Azîz Koyluogluyî bi cigêrayîşê azadîye ameya xemilnayene û vat: “Embaz Ezîzî bi seyan rojnamegerê azadî weye kerdî û nasnameyê ney aferna ke mezgêko azad û demokratîk senî aferîyeno.”
Yewîya Îrtîbatê Demokratîkî (YRD) 8ê sibate de da zanayene ke hêrişê dewleta tirke de 27ê çeleyî de, Ranya de rojnameger Azîz Koyluoglu ameyo kiştene. Embaza ey a têkoşînî û rojnamegere Stêrk Gulo qalê Azîzogluyî kerd.
Stêrke dîyar kerd ke aye 2001 de Azîz şinasnayo û vat: “Azîzî kedêka xêlî daye têkoşînê azadîye yê kurdan. O stûnêk bi. Ey mi rê qalê zîndanî kerdini. Ey vatêne ke zîndan de israrê ci yê serê azadîye zêdîyayo. Ey Herêmanê Pawitişî yê Medya de rojnamegerîye kerde, o bi vengê gerîlayan. Embaz Ezîzî çar parçeyanê Kurdîstanî de têkoşîn kerd û raştîyî resnayî dinya.
O tim fikirîyayêne, cigêrîyayêne. Ey 58 rojan Efrîn de şer teqîb kerd. Rojawan de zî bi vengê şorişî. Rojnamegerê ke qalê azadîye kenê xora tim hedefê dişmenî de yê. Embazê ma Nazim û Cîhane coka Tişrîn de ameyî hedefkerdene. Şehadetê xo ra rojêke verî embaz Azîzî mi rê telefon kerd û vat: ‘Ma do bi xoverdayîşê Tişrînî netîceyanê pîlan bivisnê destî. Xoverdayîşê şarî do netîceyanê bêhempayan xo de bîyaro.’ Embaz Azîzî Tişrîn de zî kedêka pîle daye.
Mîraso ke embaz Azîzî peyê xo de verdayo do nêro vîrakerdene. Ey kulturê xoverdayîşî ma rê teslîm kerd. Cuya rojnamegere Azîz Koyluogluyî bi cigêrayîşê azadîye ameye xemilnayene. Embaz Ezîzî bi seyan rojnamegerê azadî weye kerdî û nasnameyê ney aferna ke mezgêko azad û demokratîk senî aferîyeno. Seyît Evran hişê çapemenîya azade bi, Azîz zî şêwirmendê rayîrê ey bi”
