PKK’yî dîyar kerd ke 26 serrîya komploya mîyanneteweyî de herkes Rayberê PKK’yî Abdullah Ocalanî ra destpêkerdişêko newe paweno. Beyanatî de ame vatene ke eke astengîyêko gird nêbo, do prosesêko newe ke seba her kesî vurîyayîş û awanbîyayîşêko newe bo, dest pêbikero.
Heyetê DEM Partî ke 28ê kanûne 2024 û 22ê çele de Abdullah Ocalanî reyde pêvînayîş kerd xebatanê xo domneno. Heyet do 16ê sibate de Hewlêr de Serekê KDP’yî Mesûd Barzanî û Nêçîrvan Barzanî reyde, 17ê sibate de zî Silêmanîye de Serekê YNK’yî Bafil Talabanî, Kubat Talabanî û rayberê YNK’yî reyde bêro têhet.
‘Do vûrîyayîş bibo’
PKK’yî beyanatê xo de wina vat: “PKK û kurdî do bivurîyê, Dewleta Komare ya Tirkîya û atmosferê Tirkîya do bivurîyo, Rojhelatê Mîyanên û heme dinya do bivurîyo. Wa dewlet nêterso; Rayber Apo û kurdî dewlete nêrijnenê, do bi hawayêko demokratîk reyna awan bikerê. Wa komelê Tirkîya nêterso, Rayber Apo û kurdî Tirkîya nêkenê lete, do seba demokratîkbîyayîşê Tirkîya kar bikerê.”
‘Mesele yê ma hemînan, wezîfe yê ma hemînan’
Dewamê beyanatî de wina ame vatene: “Dîyar o ke bi vengdayîşê Rayber Apoyî prosesêko newe dest pêbikero. La heme çî do bi vengdayîşêk nêbo û heme çî zî do Rayber Apo nêkero. Senî ke mesele yê ma hemînan o, wezîfe zî yê ma hemînan o. Ganî her kes proseso newe de wezîfe û berpirsîyarîyanê xo baş fehm bikero û pratîkî de zî nînan bîyaro ca. Proseso newe do tena bi pawîtişî nêbo û do bi xebatêka hîna bihişmendîye, birêxistinî û bibeşdarî serkewte bibo.”
