Rêxistinê DBP û DEM Partî yê Şirnexî verba cezaya ke Hemşaredarê Wanî Abdullah Zeydan ameya birnayene dîyar kerd ke şarê Wanî tena nîyo û do verba waştişê tayînkerdişê qeyûmî têkoşînê xo bidomnê.
Rêxistinê Partîya Herêmanê Demokratîk (DBP), Partîya Têduştî û Demokrasîyî ya Şaran (DEM Partî) ê Şirnexî û qezayê aye, verba cezaya ke Hemşaredarê Wanî Abdullah Zeydan ameya birnayene awanîya DEM partî ya Qezaya Cizîrî beyanatêk da. Endam û temsîlîyetê dezgehanê sivîl ê Şirnexî û gelekî kes tewrê beyanatî bi. Beyanatî de pankartêko ke ser o “Dest nedin vîna gelê Wanî û rêzê ji vîna gel re bigirin / Dest medê îradeyê şarê Wanî û îradeyê şarê rê rêz bigîrê” nuştêne ame girewtene.
Metnê beyanatê hetê Hemserekê DEM Partî yê Qezaya Cizîrî Yilmaz Sanri ra ame wendene. Yilmaz Sanri ard ziwan ke Abdullah Zeyddanî rê birnayîşê cezayî eyn wextî de verba îradeyê şarî darbe yo û wina vat: “Şarê Wanî weçinitişan de verba tayînkerdişê qeyûman bi hûmarêka pîle rayê xo dayî û cewab dabi. La reyna zî îqtîdarê AKP’yî polîtîkaya xo ya destsernayîşê îradeyê şarî de israr keno. Îqtîdaro ke mehkemeyan sey amûrêk şuxilneno bi maneya tayînkerdişê qeyûmî bi hewayêko nehûqûqî hemşaredar Wanî Abdullah Zeydanî rê cez birnaye. No qerar qerarêko hûqûqî nîyo û hemverê îradeyê şarê Wanî yo. Ma tîya ra vengdanê û vanê ke; şarê Wanî tena nîyo. Ma do sey her wextî ewro zî wayîrê îradeyê xo vejîyê. Seba bicaardişê edalet û demokrasîyî ma do têkoşînê xo bidomnê.”
Beyanat bi bi çepikan û vatişê sloganê “Bijî berxwedana Wanî” qedîya.
