Wan de bi tewrbîyayîşê Hemsereka DBP’yî ya Pêroyî Çîgdem Kiliçgun Uçar û Hemsereka DEM Partî ya Pêroyî Tulay Hatîmogullari beyanatêko girseyî yeno dayene.
Dimayê Qerarê cezaya ke Hemşaredarê Şaristanê Girdî yê Wanî Abdullah Zeydanî rê ameye dayene, vizêr vernîya şaredarîye de çalakîya nobete ameye destpêkerdene û çalakî hema zî dewam kena. Hemsereka Pêroyî ya Partîya Herêmanê Demokratîk (DBP) Çîgdem Kiliçgun Uçar û Hemsereka Pêroyî ya Partîya Têduştî û Demokrasîyî ya Şaran (DEM Partî) Tulay Hatîmogullari zî tewrê çalakîya vernîya şaredarî bîyî.
Hêrişê îradeyê şarî
Hemşaredarê Şaristanê Girdî yê Wanî Abdullah Zeydan verê qisey kerd û va: “Şarê Wanî hewayo serdî de zî wayîrê îradeyê xo vejîyeno. Êyê ke hêrişê îradeyê şarî kenê û şarî rê zilm kenê, nê karê xo ra şerm nêkenê. Êyê ke dizdî û bêrêzî kenê, îradeyê yew mîlyon û 200 hezar welatîyanê bajarî diznenê û vanê ‘ma şima nêşinasnenê.’ Bedelê ey çi beno wa bibo ma do wayîrê îradeyê nê şarî bivejîyê. Ma do verba na bêşermîye rûmetê xo bipawê. Êyê ke heqdar ê û wayîrê demokrasî vejîyenê, ma yê. Ma pêro zî zanê ke no proses komplo yo. DMEE’yî derheqê naye de qerar da. Bi raya komployan wazenê reyna îradeyê şarî talan bikerê.”
‘Ma ê kerdî partîya tabela’
Hemserekê DBP’yî yê Wanî Cemal Demîrî va: “Nê îqtîdarî, zilmê xo sey şûrê Demoklesî şarê ma ser o têşana. Ma nê qebul nêkerd. Weçînayîşan de şarê ma netîceyêka başe girewt. Her 14 şaredarîyî zî girewtî û AKP nê şaristanî de kerd partîya tabela. Nika wazenê reyna îradeyê şarî talan bikerê. Na dosya, dosyaya veng a û îstînafî qet qebul nêkerd. Helwestê mehkeme helwestêko sîyasî yo û eleqeya xo huqûq reyde çin o.”
Serra Bucak: Îqtîdarî ders nêgirewt
Hemşaredara Şaristanê Girdî ya Amedî Serra Bucak va: “Kes nêeşkeno rûmet û şerefê şarê Wanî peygoş bikero. Sistemê qeyûmî sistemê komplo o. Îqtîdarî nê sistemê qeyûmî ra ders nêgirewt. Şarê Wanî îradeya xo het de ca girewt. No şar heta peynî do wayîrîye têkoşînê xo vejîyo. Ma do serkewte bê û ê zî do binkewê. Şarê Amedî şarê Wanî reyde yo. Wan rûmetê ma yo.”
Cewabê polîtîkayanê çaresernêkerdişî
Hemsereka DBP^yî ya Pêroyî Çîgdem Kiliçgun Uçar beyanatî de wina va: “Bi seyan serran o şarê kurd ver bi azadîye şono. Cinî û ciwanê Wanî nika goreyê demokrasî hereket kenê. Weçînayîşan de her tewir hîleyî kerdî, weçînayoxî şawitî la reyna zî şarê Wanî dersêka başe da polîtîkayanê qeyûmî, şerî, înkarî û asîmîlasyonî yê aqilê dewlete. Emrê qeyûmî heta weçînayîşî yo la yê şarê kurd bi hezaran serran o. Gelo huqûqê nê welatî de nasnameyê kurdan est o? Huqûqo ke ma tede ca nêgênê, huqûqê serdestan o. Qerarê na mehkema çimanê kurdan de qet qîymet xo çin o. Sûcê yew hemşaredarê ma zî çin o. Êyê ke sûcdar ê, aqilê dewlete yo. Ganî peymanêka newa ya komelkî û huqûqî biba. Ma di rey Wan girewt la wazenê reya hîrêyine qeyûm tayîn bikerê. Şarê Wanî do cewabê polîtîkayanê çaresernêkerdişî yê aqilê dewlete bido.”
‘Wext wextê qiseykerdişê demê neweyî yo’
Çîgdem Kiliçgun Uçar dîyar kerd ke problemê Tirkîya yo tewr muhîm meseleyê kurdî yo û wina dewam kerd: “Şima nê welatî de rojevanê cîya-cîyayan vejê zî problemo sereke meseleyê kurdî yo. Şima komplo kerd la şarê kurd dersê demokrasî da şima. Ma do nika şarê kurd û Rayberê Şarê Kurd rêzdar Ocalanî reyde demê neweyî ser o qisey bikê. Nameyê demê neweyî zî ganî bi çareyê demokratîk û aştî bêro vîrardene. Kesî ra veng nêvejîyeno la Îmralîyo 12 metrekareyî de hewldayîşêko pîl est o û wextê ey o ke ma piştî bidê nê hewldayîşî. Ma ê aqilê ke vano ‘Çareserbîyayîşê meseleyê kurdî mumkin nîyo’ ra vanê ke xoverdayîşê şarê kurdî xoverdayîşê neteweyê demokratîk o. Şarê kurd do bi paradîgmaya rêzdar Ocalanî verba polîtîkayanê şerê têbikoşo. Peynîya nê têkoşînî azadî ya.”
‘Hukmê nê qerarî çin o’
Hemsereka DEM Partî ya Pêroyî Tulay Hatîmogullarî xoverdayîşê şarê Wanî pîroz kerd û wina va: “Tirkîya de qet yew şaristanî de heme şaredarîyî hetê yew partî ra nêameyê girewtene. La Wanî her 14 şaredarîyî zî girewtî. Seke aseno tehemulê naye nêkenê. Komployê verênî yê Wanî ser o waşt bi mazbata bikerê. La şima zaf xurt wayîrîye îradeya xo vejîyayî û tena Tirkîya ney heme dinya vengê şima eşnawit. No, serkewtiş bi. Hemşaredarê ma texrîbat û îşkenceya zîhnîyetê qeyûmperestî vera xizmet kerd û xebitîyayî. Destê xo şaredarîyanê ma ser ra biancê, ma wazenê xizmet bikê. Rayîrê cezakerdişê rêzdar Zeydanî akenê. Çimanê ma û qanûnan de qet hukmê na ceza çin o. Na ceza tena talankerdiş nîya, eynî wextî de binpaykerdişê qanûnê bingeyênî yo. Seba ke goreyê raporê pisporan ganî ca de beraet bigirewtêne, ceza dayî. Ma nê qebul nêkenê.”
‘Na derbeyêka sîyasî ya’
Tulay Hatîmogullarî dewamê qiseykerdişê xo de ard ziwan ke îqtîdaro ke heqê weçînayîş û weçînayene seba kurdan zêde vîneno mesajê “Şima nêeşkenê Wanî îdare bikerê” dano şarî û wina dewam kerd: “No îqtîdar derbeyêka sîyasî keno. Nika zî wazeno rayîrê naye akero. Qeyûmê ke heta nika tayîn bîyê, derbeyê sîyasî bîyê. Biewnê, sey derbeyê 12ê êlule bi polîs, wesayîtê zirxînî, cop ûsn. dormeyê şaredarî girewto. Şaredarîyê ke qeyûm tayîn bîyê şewe sey dizan polîsê xo tede bi ca kerdê. Ma Wanî de nêverdanê. Wina bikerê. Ma do heta peynî pîya wayîrê îradeyê xo vejîyê û pîya serkewte bê. Netîceya heme xoverdayîşan serkewtiş o.”
‘AKP wazeno proses wedarno’
Tulay Hatîmogullarî va ke AKP wazeno nê prosesî wedarna û qiseykerdişê xo wina qedêna: “Îmralî reyde pêvînayîş benê û seba çareyêko demokratîk û aştîyane prosesê muzakereyan ser o yeno qiseykerdene. Bi tayînkerdişê qeyûman û cezakerdişê hemşaredaranê ma wazenê nê prosesî wedarnê. Ma nê qebul nêkenê. Ma wazenê prosesê aştî û muzakereyan dewam biko. Ma wazenê no muzakere bi aştî biqedîyo. La şima wazenê bi operasyonanê serê sibayî, bi cezakerdişê hemşaredaranê ma û bi tayînkerdişê qeyûman nê prosese wedarnê.”
‘Çimê herkesî Wanî der o’
“Ma do her çar hetanê Tirkîya de piştî bidê Wanî. Zerrîya herkesî seba Wanî dana piro. Abdullah Zeydan, Neslîhan Şedal û heme weçînayoxê ma rûmetê ma yê. Ricaya ma a ya ke vera hewldayîşê talankerdişê îradeyî nê meydanî veng meverdê. Ma do xover bidê, têbikoşê û serkewte bê.”
Badê qiseykerdişan, şar dest bi govende kerd.
