Rayîrşîyayîşo derg yê 26 rojan ke çarçeweya “Rayber Apoyî re Azadîye, Meseleyê Kurdî rê çareserîye” ameybê destpêkerdene, roja 24. de dewam keno.
Çalakîkerê ke serê sibayî şaristanî de rayîrî ra şîyê, şand tewrê kombîyayişê şarî bîyê. Beşdaran ra Sanîye Tûnç kombîyayîşî de qisey kerd û dîyar kerd ke amancê înan o yo ke rayîrşîyayîş û mitîngo pîlo ke do 15ê sibate de Strasbourgî de bêro kerdene hîna xurt bikerê.
Sanîye Tûnç ard ziwan ke na çalakî tena rayîrşîyayîş nîyo û vat: “Ma bi pêvînayîşanê dîplomatîkan û kombîyayîşanê şarî têkoşînê xo domnenê.”
Sanîye Tûnç dîyar kerd ke moralê înan berz o û bi nê moral û coşî do 15ê sibate de şarê reyde kom bibê.”
Sîyasetmedar Ferhat Encu zî kombîyayîşê şarî de qisey kerd û bale ant xoverdayîşê şarê kurd ser o û dîyar kerd ke şarê kurd êdî hemverê bênasnameverdişî 50 serrî yo ke xover dano.
Ferhat Encu ard ziwan ke paradîgma û têkoşînê azadîye ya Rayberê PKK’yî Abdullah Ocalanî heme dinya rê bîya nimûne û vat: “Amancê dewleta tirke o yo ke mase de destê kurdan qels bikera. Nê semedî ra ganî ma hemverê hêrişanê dewlete xover bidê û heqanê xo heta peynî bipawê. Çalakîya ke do 15ê sibate de bêra kerdene zî ganî bi nê bingeyê bêra vînayene. Seba pawitişê deskewteyan ganî şarê ma Strasbourgî de bibo.”
