Qezaya Amedî Pîran de welatî Elî Guneş û Yaşar Aktertî derheqê prosesê peyên de qisey kerd û vat heta ke nameyê prosesî nêro dayene ma nêeşkenê bawerîya xo bi înan bîyarê.
Derheqê prosesê peyên de welatîyê bi nameyê Elî Guneş û Yaşar Aktert Ajansê Welatî (AW) rê derheqê prosesê peyenî de qisey kerd.
Elî Guneş qiseykerdişê xo de da zanayene ke proses bi hewayêko zelal nêameyo ramnayene. Ganî heme çî zelal bibo, waştişê ma bêrê qebulkerdene û wina vat: “No prosesêko ke rayber Abdullah Ocalanî dayo destpêkerdene ma zaf muhîm vînenê. Xora waştişê ma zî wa û birayîya şaran a. Ma wazenê destpêkî de nameyê prosesê bêro dayene û proses bi hewayêko zella bêro ramnayene. Neticeyê nê prosesî de deskewteyê şarê kurdî zî zelal bibê.
‘Meseleyê kurdî de partî û sazî bêveng manenê’
Elî Guneş wina dewam kerd: “Bawerîya mi bi dewlete çin a. Hetêkî ra vanê ma prosesêko newe dayo destpêkerdene hetêk ra zî qeyûman tayînê şaredarîyanê ma kenê, îradeyê şarê kurd xesp kenê. Ez nê çîyî raşt nêvînena. Meseleyê Kurdî de zafaneyê partî û dezgeyê sîvîlî bêveng manenê. Wexto ke dezgeyê sîvîl û partîyê sîyasî rolê xo nêmojnê dewlete zî gamanê laziman nêerzena. Ez vana ganî nê dezge û partîyî rolê xo hîna zaf bimojnê. Tirk wayîrê çi heq û hiqûqî wa kurd zî bibê wayîrê eyn heq û hiqûqan. Bi nê hewayî êdî aştîyêka baş lazim a.”
‘Hukmat bi kerdişanê xo mojnena ke aştî nêwazena’
Yaşar Aktert qiseykerdişê xo de ard ziwan ke prosesêk est o la seba ke no proses bireso encamêk pratikê hukmatî nêbedilîyenê û wina dewam kerd: “Hukmat bi nê kerdişanê xo orte de yew aştî nêverdano. Her roj qeyûman tayînî şaredarîyanê ma keno, ÎHA û SÎHA’yan reyde hêrişê Rojawanê Kurdîstanî kena. Hukmat bi nê kerdişanê xo dîyar keno ke yew atmosferê aştî nêwazeno. Ma wazenê bi ziwanê xo, bi kulturê xo biciwîyê la nê hetî ra hukmat pratîkî de çîyêk nêkeno. O semedî ra nê prosesî ra çîyêk hişê ma nêkeweno. Ma wazenê la ê ke hemverê ma de yê nêwazenê. Tirkî heta CHP zî nêwazena. Wexto ke şarê kurdî çîyêk bêro kerdene ez ewnîyena ê zî sey hukmat têgêrenê. Nê prosesî ra hêvîya mi çin a. Ma rewra yo hazir ê, ma qayil ê yew aştî bîba. Ma paweyê mesajê Rayberê Şarê Kurd bîyê. O ê xo vatî la zî hema zî hemverî ra çîyêk nêameyo vatiş. Vatişê ma dîyar o. Ma vanê ma pîya biciwîyê û ma wa û birayîye wazenê.
