Endamê Heyetê Îmraliyî yê DEM Partî Sirri Sureyya Onder derheqê pêvînayîşanê Herêma Federal a Kurdîstanî de Ajansê Mezopotamya (MA) rê qisey kerd û dîyar kerd ke ê do mesajanê nê pêvînayîşan biresnê Ocalanî.
Heyetê DEM Partî yê Îmraliyî 16ê sibate ra nata Herêma Federe a Kurdîstanî de pêvînayîşî kerdêne û pêvînayîşî vizêr qedîyayê.
Heyetî de endamê Heyetê DEM Partî yê Îmraliyî Pervîn Buldan û Sirri Sureyya Onder, hemserekê DBP’yî Keskîn Bayindir, hemverfekê Komîsyonê Têkîlîyanê Teberî yê DEM Partî Berdan Ozturk, parlamenter Gulcan Kaçmaz Sayyîgît, Mehmet Kamaç û avûkat û endamê Buroyê Hiqûqî yê Asrinî Îbrahîm Bîlmez û Ozgur Erol ca girewt.
Heyetê bi Serekê PDK’yî Mesûd Barzanî, serekê Herêma Federe a Kurdîstanî Nêçirvan Barzanî, serekê YNK’yî Bafel Talabanî, cagirê serekwezîrê Herêma Federal a Kurdîstanî Qubat Talabanî, endama Dîwanê Serekî ya YNK’yî Şanaz Îbrahîm Ehmed û serekwezîrê Herêma Federal a Kurdîstanî Mesrûr Barzanî reyde pêvînayîş kerd.
Do mesajan biresnê
Sirri Sureyya Onder derheqê pêvînayîşan de qisey kerd û dîyar kerd ke pêvînayîş pozîtîf vîyartê û wina vat: “Heme şexsîyetê sîyasî, sazî û partîyan bi çoşêko pîl ma pêşwazî kerdê. Seba nê coşî ez înan rê sipas kena. Ma derheqê prosesî de peşnîyar, hişyarî û piştîya înan girewt. Nê peşnîyarî seba ma û seba aştî zaf erjîyaye yê. Ma do nînan biresnê birêz Ocalanî.”
Onder derheqê babetanê ke pêvînayîşan de ameyê qieykerdene wina vat: “Zafane ma mesajê birêz Ocalanî yê ke pêvînayîşanê ma de ameyê dayene resnayê înan. Ma hewl da bibê cewab. Tewrê nînan babeta yewîya neteweyî zî ameye qiseykerdene. Ma hewl da ke derheqê aştî de bingeyêko hîra yê komelî awan bikê.”
‘Qîymetêko pîl da prosesî’
Onderî dîyar kerd ke seba proseso newe paştîyêka tam yena dayene û wina vat: “Qiymetêko pîl da prosesî. Heme mûxatabê ke ma înan reyde pêvînayîş kerd seba mesajanê ke ameyê dayene û vengdayîşî qîymetêko pîl da. No zî hem hêvî dano ma û hem zî rûmetê dano.”
Onderî dîyar kerd ke serekê partîyan ke înan reyde pêvînayîş kerdo waşto mesajanê înan biresnê Abdullah Ocalanî û vat: “Bêguman piştîya xo ard ziwan. Detayê pêvînayîşan zî est ê. Ma do înan biresnê birêz Ocalanî.”
