Bi boneya 21ê Sibatê Roja Zimanê Dayikê ya Cîhanê li Amedê bi beşdariya stranbêj Ayfer Duzdaş û Alî Tekbaş û Şanoya Bajêr a Amedê şahiyek bêhempa hat lidarxistin û di peyama girîngiya zimanê Kurdî hat dayîn.
Bi pêşengtiya Komeleya Lêkolînên Ziman û Çandên Mezopotamyayê (MED-DER), Sanatça Organîzasyon û Şaredariya Bajarê Mezin a Amedê û Şaredariya Peyasê bi boneya 21ê Sibatê Roja Zimanê Dayikê yê Cîhanê li ÇandAmedê bi beşdariya stranbêj û şanogeran şahiyek bêhempa hat lidarxistin. Hevşaredarê Peyasê Cengîz Dundar, Hevşaredara Bajarê Nû Safiye Akdag, rêveberên MED-DERê û bi sedan welatî tev li şahiyê bûn.
Kêliya ku welatiyan li salona mezin a ÇandAmedê cihê xwe digirtin, şagirtên Koperatîfa Çand, Hûner û Ziman a ANKAyê bi berzkirina dirûşmeya “Zarok ziman û azadî” û bi cil û bergên xwe yên Kurdî hatin salonê. Di vê kêliyê de atmosfera li salonê derket asta herî jor û her kesî ji zarokan re li çepikan da û dirûşm berz kirin. Zarok di ser dikê re derbasî cihê xwe bûn û beşdaran silav kirin.
Welatiyên ku beşdarî şahiyê jî bûn ji ajansa me re axivîn û bal kişandin ser girîngiya zimanê Kurdî û xwestin ku zimanê Kurdî bibe zimanê fermî û zimanê perwerdehiyê.
Şahiyê bi pêşandana sînevîzyonek ku qala xebatên MED-DERê û saziyên din ên zimanê Kurdî dikir dest pê kir. Sînevziyonê bal kişand ser pêkitû û qedexeyên li ser zimanê Kurdî.
‘Zimanê me nasnama me ye’
Piştî sînevizyonê Hevserokê MED-DERê Remzî Azîzoglu axivî û da zanîn ku Kurd bi salan in ji bo nasnameya xwe têdikoşin û got: “Her çiqas bixwazin ku zimanê Kurdî bikeve bin xeteryê jî lê em ê destûrê nedin. Zimanê me nasnamame ye. Ji ber ku nasnameya me winda nebe divê Kurd bi her awayî xwedî li ziman û nirxên xwe derkevin.”
‘Em hemû berpirsiyarê parastina zimanê xwe ne’
Hevşaredarê Peyasê Cengîz Dundar jî axivî û bal kişand ser girîngî û parastina çand û zimanê Kurdî. Cengîz Dundar banga xwedî derketina li zimanê Kurdî kir.
Seroka Daîreya Karên Çandê ya Şaredariya Bajarê Mezin a Amedê Zeynep Yaş jî axivî û diyar kir ku gelê Kurd ji bo zimanê xwe sedsalan e li ber xwe dide û got: “Em hemû berpirsiyarê parastina zimanê xwe ne. Divê em her roj her saet xwedî li zimanê xwe derkevin.”
Ayfer Duzdaş bi stranên xwe welatiyan bir herêma Sêwaz û Meletiyê
Pîştî axaftinan şahiyê dest pê kir. Ewilî stranbêj Ayfer Duzdaş ku meqam û terza stranên herêma Sêwazê tê nasîn derket ser dikê û ji vê herêmê gelek stran gotin.
Bi skêçê bal kişandin ser girîngiya Kurdî
Bi du stranên Ayferê re ekîba Şanoya Bajêr a Amedê derket ser dikê û skêça “Kurdî û Banqe” pêşkêşî beşdaran kir. Skêç behsa girîngî û xwedî derketina li zimanê Kurdî dikir. Di skêça de hat nîşandan ku banqeyên ku li welatiyan digerin çawa bi zimanê Tirkî Kurdan asîmile dikin û bal kişandin ser nebûna xizmeta van saziyên cemaweriyê ya ne bi Kurdî.
Lawjeyên Colemêrgê salon rakir ser pêya
Piştre jî stranbêj Alî Tekbaş derket ser dikê û coş û peroşa li salonê derxist asta herî jor. Alî Tekbaş ê ku lawje û selîqeyên herêma Colemêrgê tê nasîn bêtirîn stranên herêma Colemêrgê gotin û welatiyan li ber stranên xwe coşand.
Şahî li ber stranên Alî Tekbaş û gerandina govendê bi dawî bû.
Tekbaş: Divê êdî zimanê Kurdî bigihîje statuya xwe
Alî Tekbaş piştî konserê ji ajansa me re axivî û pîrozbahiyê li ajansa me kir. Alî Tekbaş da zanîn ku Kurd jî wek her netewê bi ziman, çand û stranên xwe tên zanîn. Alî Tekbaş destnîşan kir ku divê zimanê Kurdî êdî bigihîje azadî û statuya xwe û xwest perwerdehiya bi zimanê Kurdî wek mafekî were nasîn.
