Rojnamegerê ke Wan de yê: Ma zilmê polîsan qebul nêkenê

Merkezê Xeberan / AW

Rojnamegerê ke Wan de xebitîyenê derheqê zilm û muameleyê xirabî yê polîsan muracaatê Baroyê Wanî kerd. Baroyî dîyar kerd ke ê do muracaatê heme rayîranê huqûqî bikerê û heqê rojnamegeran bipawê.

Rojnameger û kedkarê çapemenîye yê Wanî ke nê deman de rastê hêrîş, zilm, tepiştiş û heqaretê polîsan yenê, derheqê binpaykerdiştê heqanê xo muracaatê Baroyê Wanî kerd. Rojnamegeran bi rayberîya Komeleya Rojnamegeranê Dîcle Firatî (DFG), Komeleya Rojnamegeranê Cinîyan a Mezopotamya (MKG) bi Serekê Baroyê Wanî Sînan Ozaraz û rayberîya baroyî reyde pêvînayîş pê ard. Rojnamegeran behsê zilmê çapemenîye ser o kerd. Baroyî seba teqîbkerdişê zilmê çapemenîye ser o û komkerdişê delîlan soz da rojnamegeran û dîyar kerd ke ê do polîsanê ke nê çî kenê, şîkayet bikerê. Reyna baroyî dîyar kerd ke ê do muracaatê heme rayîranê huqûqî bikerê û raporê ke do amade bikerê, do sazîyanê mîyanneteweyîyan rê zî bierşawê.

‘Ma do vera neheqîye muracaatê heme rayiranê huqûqî bikerê’

Zîyaretî de Temsîlkarê DFG’yî yê Wanî Adnan Bîlenî qisey kerd û dîyar kerd ke ê derheqê zilmê polîsan ê çapemenîye û rojnamegeran ser o tîya de kom bîyê. Adnan Bîlenî va ke nê deman de û heme çalakîyanê komelkî de polîsî rojnamegeran kenê hedef û zilm, tehdît, heqaret û muameleyê xirabî kenê. Adnan Bîlenî îfade kerd ke ê do nê meseleyî ser o vinderê û muracaatê heme rayiranê huqûqî bikerê.

Ozaraz: Çi bikewo milê ma ser o ma do bikerê

Serekê Baroyê Wanî Sînan Ozarazî zî dîyar kerd ke ê do seba komkerdişê delîlan komîsyonêk awan bikerê û raporêk biweşanê. Sînan Ozarazî ard ziwan ke badê komkerdişê delîlan ê do muracaatê Walîtîya Wanî, Mudirîya Polîsan a Wanî, Wezaretê Karê Zereyî û sazîyanê mîyanneteweyîyan bikerê. Sînan Ozarazî zî seba teqîbkerdişê zilmê polîsan ê rojnamegeran ser o soz da û vat ke hetê huqûqî ra çi bikewo milê înan ser o ê do bikerê.