Endamê Konseya Rayberdişî ya KCK’yî Mustafa Karasuyî vat PKK do kongre bikero û gerek nê prosesî de Rayberê Şarê Kurd bikewo dewre. Karasuyî vat gerek wextê kongre de hêzê dewlete zî hêrişanê xo vindarnê.
Endamê Konseya Rayberdişî ya KCK’yî Mustafa Karasuyî programêkê taybetî yê Medya Haberî de qisey kerd. Karasuyî ard ziwan ke çarçewaya vengdayîşê Rayberê Şarê Kurd Abdullah Ocalanî yê 27ê sibate de PKK do kongre bikero û vat nê prosesê ke PKK’yî adirbirnayîş îlan kerdo gerek hêzê dewlete hêrişanê xo vindarnê, eke goreyê adirbirnayîşî nêro têgêrayene no do bêro manaya sabotajî.
Karasuyî vat: “PKK’yî hem tarîxê kurd-Kurdîstanî de hem zî tarîxê Rojhelatê Mîyanênî de çîyê ke qet hêzêkî nêafirnayî, afirnayî. Têna erjî nêafirnayî xeyrê ci xeylê hêzê sîyasîyî payra mendî. La kam ke vano PKKyî çi da qezenckerdene, têkoşînê xo de çî fîna dest, besîtîya xo mojneno ra. Ma eşkenê her qeyde cewab bidê înan.”
Qiseykerdişê Mustafa Karasuyî ra qismêk wina yo:
“Vengdayîşê Haştîye û Komelê Demokratîkî bi kede û têkoşînê 50 serran ê Rayberîye bi. Reyna naye de tesîro gird yê kampanyaya ‘Abdullah Ocalanî rê azadîye meseleya kurdan rê çareserî’ est o.
Pêvînayîşê bi Rayberîye ameyî kerdene û Rayberîye rayapêroyîye ya dinya rê eşkerayîye daye. Eşkerayîya bidîmen daye la dîmenî nêameyî dayene, têna fotograf ame dayene. Fotograf de vînayîşê Rayberîye zî moral û hêz da ma. Moral û hêz da şarê ma zî. Nê hetî ra na eşkerayîye raşta zî zaf zaf muhîm a. Eşkerayîye belka kilm bî la her cumleya ci de felsefeyêke, famêkê sîyasî fîneno meydan. Nê hetî ra erjîyaye ya. Raşta heyecan ma girewt. Wexê eşkerayîye de hîsê ma yê cîya cîyayî kewtî têmîyan. Eşkerayîye ke perspektîfê seserran a tesîro gird kerd.
Şar bi serran o, des serran o vano ‘PKK şar o, şar tîya de yo.’ PKK semedê şarê kurdî, Kurdîstanî têna partîyêka sîyasîyî nîya. Partîyanê sîyasîyan ê dinya ra cîya yo. Cuyeya ci yo, kultur, estbîyayîşê ci yo. Partîyêka ke ruh da ci, bawerî da ci zaf çî ci rê da qezenckerdene. Coka feskerdişê ci hîsîye afirnaye la no est o PKK bedilîyeno. Bi şeklê neweyî kewno mîyanê têkoşînê sîyasîyî, ya zî ma vajê bi tewirê neweyî rayîrê têkoşînê sîyasîyî, tarîxî bewlî keno. Tesîrê ci yê tarîxî do bibo. Bi feskerdişî kultur û çîyê ke afrinayî werte ra nînê wedaritene. PKKyî bi têkoşînê xo yê 50 serran nê şarî rê zaf çî da qezenckerdene. Tesîrê nê bi seserran dewam bikero. No wa wina bêro zanayene. Nê eşkerayîye Rayberîye, no nizdîbîyayîşê ci do şarî rê dahîna zaf bido qezenckerdene. Rayberîye senî nizdî beno, têgêrayîş senî nizdî beno şarê ma zî do wina nizdî bibo.
No mîladêko newe yo. Têna semedê kurdan nê semedê heme şaranê Tirkîya, semedê heme Rojhelatê Mîyanênî nuqtaya bedilnayîşî ya. Nê hetî ra ma eşkerayîya Rayberîye bi hurmet selam kenê. Ma do cewabê keda Rayberîye bidê. Ma sey têgêrayîşî tim cehd kenê ke cewabê keda Rayberîye bidê. Beno ke kemîya ma bibo la ma tim kerd ke xeta îdeolojîk, polîtîk ya Rayberîye de cewabê keda ci bidê.
PKK têgêrayîşêkê Rayberîye yo. Polîtîka û îdeolojîya PKK’yî Rayberîye bewlî kerd. Ma teqîpkarê Rayberîye yê. Ma do vatişanê Rayberîye yê feskerdişê PKK’yî, qedînayîşê têkoşînê çekdarî bîyarî ca. Na babete de wa teredutê çewî çînê bê. Dewlete û îqtîdar zî gerek xo peyê bahaneyan de nênimnê semedê demokratîkbîyayîşî çîyo ke hewce keno bikerê. Gerek Rayberîye bieşko şertanê azadan de bigurîyo. Rayberîye gerek bieşko tay kesan de pêvînayîş bikero. Têkoşînê 50 serran, problemê 100 seran bi mektubêk çareser nêbeno. La îradayêk û qerardarîye est a. Hukmat û selahîyetdarî gerek verê îradeyê qerardarî abikê. Devlet Bahçeli vat ‘wa veng bido ma do dima ra heqê hêvî bîyarî ca.’ Vengdayîş ame kerdene. Nika gerek heqê hêvî bêro caardene. Gerek hinî şertê sîyasî û huqûqî bêrê caardene. Heta ke nê mebê hendê gerîlayî senî çeke nanê ro?
Şarê kurdî wa qisawet mekero, wa paştîya ci tira pêt bo. Wa bizano ke na gama semedê demokratîkbîyayîşê Tirkîya hem zî semedê çareserkerdişê meseleya kurdan ameye eştene û wayîrê vengdayîşî bivejîyo. Gerek sere de cinîyî û ciwanî wayîrê ci bivejîyê. Serkêşê nê têgêrayîşî ê yê. Qedîyayîşê şerî tewr zaf têkoşînê azadîye yê cinîyan do aver bêro. Nê prosesî de do tewr zaf cinîyî qezenc bikerê. No peynî nîyo, destpêkerdişê o. Na merhaleyêka newî ya têkoşînî ya, mîladêko newe yo.Şarê kurdî û heme hetê demokratîkî wa nê wina bivînê û wayîrê ci bivejê.
Nika ma adirbirnayîş îlan kerd. PKK do konreya xo bikero. PKK do kongre de qeraran bigîro. No do wextêk de bêro kerdene. Cade di rojan de, hîrê rojan de nêbeno. Xora gerek Rayber Apo bikewo dewre. Gerek nê prosesî de hêrişî mebê. Yanî eke gerîlayanê ke meşrû mudafa de yê, înan rê hêriş bibo se kenê? Vanê bê mi bikeşê? Bê mi esîr bigîrê? Nê hetî ra gerek goreyê adirbirnayîşî bêro têgêrayene. Ya, ma adirbirnayîş îlan kerd. O wext wa dewlete û artêş zî goreyê nê têbigêrê. Eke goreyê ci têmegêrê no provokasyon o. Sabatoj o. No yeno manayê vatişê ez qebul nêkana. Na babete de gerek merdim baldar bo. Eke yeno waştene ke no proses bêro dewamkerdene, gerek goreyê adirbirnayîşî bêro têgêrayene.”
