Serekê Şaristanê Amedî yê Partîya Saadetî Abdurrahman Ergîn pêvajo ser va ke wa êdî Tirkîya binê sîya nakokî û dibendîye ra vejîyo û ver bi aştî, zengînî, averşîyaşî rê şîra û dîyar kerd ke ê Partîya Saadetî seba awankerdişê nîzamêko meşrû rê hadre yê.
27ê Sibate de Rayberê Şarê Kurd Abdullah Ocalan, hepsîyê sîyasî yê ke Îmrali de manenê û Heyetê Îmraliyî pîya beyanatêk dabî û beyanatî ra pey zî Tirkîya demêko newe destpê kerd. Demo newe ser o heme dormeyanra kesî şîroveyê xo anenê ziwan. Serekê Şaristanê Amedî yê Partîya Saadetî Abdurrahman Ergîn zî bi ser nameyê “Problemê Kurd” beyanato nuşteyî da.
Beyanat wina yo:
“Problemê kurd ke meseleya tewro avzel a Tirkîya ya, encax bi çareserîyêka mayînde û hera, ser esasê aştî û birayîye eşkîyena bêro çareserkerdene. Demê peynî de mesajê Abdullah Ocalan û nîqaşê çarçiweya mesajî de ma rayêko bîn ser aştîya komelî û ameyoxêko hembarîye ser fikrîyenê. Ma Partîya Saadetî wazenê ke na pêvaja bi nêzdîbîyayîşêko zerrî û zelal ke verê pêameyîşê komelî biakero û aver bibo.
Problemê kurd problemêko zaf xorîn û tarîxî yo ke tena bi polîtîkayê ewleyî nîno çareserkerdene. Çareserî tena ser esasê heq, adalet û demokratîkbîyayîşî pê yena. Her hemlayêka pozîtîf a ewro bêro eştiş, do nê tena heremêke ra, pêroyîya Tirkîya ra bandor biko û do ameyoxê welatê ma zî dîyar biko. No ser wa game seba seyyewbînankerdişê komelî û bawerîya şarî ser bi cesaret bêrê eştiş.
Bêvengîya çekan û akerdişê rayîrî verê têkoşînê sîyasî destkewteyêk seba heme beşê komelî yê. Pêvajoya ke ewro yena nîqaşkerdene, ser vengdayîşê ke PKK çekan verado û sazûmanîya xo ya rêxistinî rijno pê yeno. Hawanayîşê tundîye seba cuyeya hembar a aştîyane ya şarê ma gamêka avzel a la belê wa nîro vîrakerdiş ke aştî nê tena bi fedakarîya hetêkî nê, bi gamê ke pêbawerîye pê anena, pê yeno.
No xale de wa dewlete bi xeletîyê xo de rî bi rî bimano, bêhuquqîye werte ra hewano, polîtîkayê înkar û asîmîlasyonî ra zî fekverado. Nasname, ziwan, kulturê kurd û heqê temsîlîyetê sîyasî wa bi qanûno bingeyî bêro garantîkerdene; wa peynîya polîtîkayê qeyûmî bêro û astengîyê verî yê beşdarbîyayîşê demokratîke zî bêrê hawanayîş.
Çareserkerdişê problemê kurd nê tena bi reformê sîyasî, her wina bi gamê averberdişê aborî û komelî zî wa bêro destekkerdiş. Seba herême wa polîtîkayê teşwîqê yê hera bêrê averberdiş, îmkanê seyyewbînan bêrê temînkerdene û projeyê sermayegozarîya aborî bêrê bicaardişî. Çareserkerdişê problemê bêkarî û feqîrîye yê herêma Rojhilat û Başûrê Rojhilatê Anatolyaye seba aştîyêka mayînde gamêka avzel a. Na çarçiwe de lazim o dewlet seba şarê herême polîtîkayê komelî xurt bika û pêşengîya averberdişê aborî ya herême bika.
Lazim o na pêvajo nêba qurbanê nîqaşê sîyasî û bi famkerdişêkî ke heme beşê komelî hembêz keno bêro rayîrberdişî. Wa êdî Tirkîya binê sîya nakokî ra vejo û ver bi aştî, zengînî, averşîyaşî rê şîra. Ma Partîya Saadetî seba awankerdişê nîzamêko meşrû rê hadre yê. Ma do seba awankerdişê aştî, birayîye û aramîya komelî verpirsîyarîya xo bidomnê. Ma hêvîdar ê ke na pêvajo hawilmend bibo û ma veng heme hetan kenê ke bi aqilane û bi verpirsîyarî hereket bikerê.”
