DEM Partî seba serrgêra Qirkerdişê Koçgirê ke bi hezaran kurdê elewîyî ameyê kiştiş ser o beyanato nuştekî da û beyanatî de ame vatiş ke ê do her tim hafizayê xo teze bitepişê ke têkoşînê heqîqet û edaletî bi domdarî bidomnê.
Komîsyonê Bawerî û Şaran yê DEM Partî serrgêra Qirkerdişê Koçgirî ser o beyanato nuştekî da û beyanatî de ame vatiş ke kesê ke nê qirkerdişî de cuya xo daya, înan bi hurmet vîr anê û wina ame vatiş: “Nê qirkerdişî de cinî, doman û îxtîyar nêvatê, qetil kerdê. Qirkerdişê Koçgirî hema zî hişê şarê ma de tezeyîya xo paweno. Qirkerdişê Koçgirî ra pey Dêrsim, Mereş, Sêwaz û Çorum de çi heyfo ke qirkerdiş ame kerdiş. Ma do her tim hafizayê xo teze bitepişê ke têkoşînê heqîqet û edaletî bi domdarî bidomnê.”
