Mamosteya Mexmurî ya ke nîgar dana xêzkerdine, dîyar kerd ke seba ciwanê kurd kulturê qirkerdişî ra bixelesnê, lazim o heme xo hetê kulturî ra aver bibê.
Merkezê Kultur û Hunerî yê Wargehê Koçberan ê Şehîd Rustem Cudî (Mexmur) seba averberdişê hetê hunerî yê ciwanê wargehî, dem dem perwerdeyê hunerî sazûman kenê. Verê hîrê aşman seba averberdişê doman û ciwanan, Merkezê Kultur û Hunerê Mexmurî de perwerdeyêk ya xêzkerdişê nîgaran ame destpê kerdiş.
Derheqê perwerdeyî û karê xo ser mamoste Îlhan Hilalî Rojnewsî ra qise kerd.
Demê domanîya mi destpê kerd
Mamoste Îlham Hilalî dîyar kerd ke ê bi hembarîya embazê xo beşdarî na xebate bîya û va: “Heskerdişê mi yê verba viraştişê nîgarî de, demê domanîya mi de destpê kerd. Demê mi kay zî kaykerd, mi her tim nîgar viraştine. Mîyanê keyeyî de zî demê waya mi nîgar viraştine, mi temaşeyê înan kerdine û mi zî nîgar xêz kerdine. Bi demî ra hîsê mi yê verba viraştişê nîgaran zêde bî. Peynîya demêkî îmkan kewt destê mi ke ez atolyeya Şehîd Delîla de xêzkerdişî de perwerdeyê nîgarî bivîna.”
Wendekarê mi zî bîyê hetkar
Îlham Hilalî wina domna: “Na pêvajo de ma ser dêsê dibistanê wargehî ra nîgar viraştine, no zî seba mi bî ceribnayîşêko gird, ez bieşkera xo hetê xêzkerdişê nîgaran de aver biba. Peynî mi dibistana hadreyî qedîna, mi waşt ez kar bikera, ser pêşnîyara embazêk ya xo ez beşdarî kar û xebatê Kultur û Hunerê Mexmurî bîya. Mi mîyanê xebatê kultur û hunerî de dest bi mamosteyîya nîgarî kerd. Demê mi no perwerde da destpêkerdiş, zaf kesan serpiroyê nê perwerdeyî kerd. Mi sey kes hêvî nêkerdine ke zaf wendekarê mi bibê. Rojê destpêkî kelecana mi ya verba domanan zaf bî. Hem têkilîya mi bi wendekarê mi zêdî bî, hem zî ez nîgar de başêr bîya. Wendekarê mi zî bi mi ra bîyê hetkar û ez zî înan ra bîya hetkar.”
