Hemsereka Pêroyî ya DBP’yî Çîgdem Kiliçgun Ucar vizêr Dêrsim de têhetameyîşê “Komelo Aştî û Demokratîkî” de qisey kerd û muhîmîya nê vengdayîşî ard ziwan.
Vengdayîşê Rayberê Şarê Kurd Abdullah Ocalanî yê “Komelo Aştî û Demokratîk” heme cayê dinya de hetê kes û sazîyanê muhîm ra eleqayêko gird vîneno û sey manîfestoyêk yeno pênasekerdene. Nê vengdayîşî ra pey Partîya Herêmanê Demokratîk (DBP) û Partîya Têduştî û Demokrasîyî ya Şaran (DEM Partî) herêmanê cîya-cîyayan de şarê reyde têhetameyîşan organîze kena ke proses û vengdayîş baş bêro fehmkerdene.
Hemsereka Pêroyî ya DBP’yî Çîgdem Kiliçgun Uçar vizêr Dêrsim de têhetameyîşê şarî de qisey kerd û ard ziwan ke nê vengdayîşî de sîyasetêko demokratîk est o ke kilîtê çareserî yo.
‘Do Komelo Demokratîk bêro awankerdene’
Çîgdem Kiliçgun Uçar ard ziwan ke nê vengdayîşê waştişê awankerdişê Komelo Demokratîk est o û wina dewam kerd: “Nê vengdayîşî de di çîyê est ê ke zaf giran ê. Vano ke ‘ma pêrodayîşê xo ra xoverdayîşê xo ra ca nêmanê’, vano ke ma Komelo Demokratîk awan bikerê. Çi est o na no komelo demokratîk de? Komelo Demokratîk de, her kes fikrê xo bîyaro ziwan herkes bi ziwanê xo qisey bikero, kamîya ma bêro naskerdene. No çîyêko zehmet o? Zehmet nîyo . Heta nika zereyê pêrodayîşê ma de çi est bî? Ma vat ziwanê ma est o ma wazenê ziwanê xo de qisey bikerê, ma vat ke bawerîyêka ma est a ma wazenê goreyê aye biciwîyê, ma vat ke kamîya est a ke yê şima ra cîya ya. Na kamîya ma tehdît nîya. Çira şima rê giran yena. Coka nê vengdayîşî de vajîyeno ke Komelo Demokratîk bêro awankerdene. Bi destî kamî, bi destê ma.”
Uçar bale ant sîyaseto demokratîk ser o ke kilîtê çareserî yo û wina vat: “Sîyasetêko demokratîk est o nê vengdayîşî de. Sîyaseto demokratîk, kîlîtê çareserî yo. Sîyaseto demokratîkî vano ke nê welatî de tena yew netewe çin a. Nê welatî de dewlemendîyêka winasîn est a ke serê dinya de çin a. Tirk est ê, kurdî est ê, ermenî est ê, suryanî est ê; ziwanê înan est o, ê bi xo est ê. Nê heme ke ameyê têhet beno dewlemendî. Se bi heta nika, vatêne ke tena tirkî est ê. Dewlemendîya welatê ma kerde çol. Bi nê vengdayîşî ma do nê nêzdîbîyayîşan orte ra wedarnê.”
